Քաղաքականություն
01.11.2022 | 14:33
ՌԴ Դաշնային խորհուրդը խորհրդակցություններ է սկսել՝ Հայաստանի և Ադրբեջանի հետ եռակողմ միջխորհրդարանական շփումներ սկսելու համար կողմերի միջև վստահություն ստեղծելու նպատակով։ Այս մասին հայտարարել է Դաշնության խորհրդի փոխխոսնակ Կոնստանտին Կոսաչովը, գրում է ՏԱՍՍ-ը։
«Երեկվա համատեղ հայտարարության մեջ Ռուսաստանի, Ադրբեջանի և Հայաստանի ղեկավարները, այլ հարցերից զատ, ընդգծել են Ադրբեջանի և Հայաստանի միջև դրական մթնոլորտի ձևավորման կարևորությունը հասարակության ներկայացուցիչների, փորձագիտական հանրության, հոգևոր առաջնորդների միջև երկխոսությունը շարունակելու համար ռուսական օգնությամբ, ինչպես նաև տալու եռակողմ միջխորհրդարանական շփումների մեկնարկը՝ երկու երկրների ժողովուրդների միջև վստահության ամրապնդման նպատակով։ Այդ առաջադրանքի իրագործման համար նպատակ ունենք գործարկել Ադրբեջանի և Հայաստանի հետ երկկողմ միջխորհրդարանական հանձնաժողովների մեխանիզմները։ Համապատասխան խորհրդակցությունները Դաշնային խորհրդի մասով արդեն սկսվել են»,- տելեգրամյան իր ալիքում գրել է Կոսաչովը։
Հիշեցնենք, որ Հայաստանի վարչապետ Նիկոլ Փաշինյանի, ՌԴ նախագահ Վլադիմիր Պուտինի և Ադրբեջանի նախագահ Իլհամ Ալիևի եռակողմ հանդիպումը տեղի է ունեցել նախօրեին Սոչիում։
Էմմա Չոբանյան
