31.05.2026 | 13:33
Օդի ջերմաստիճանը կբարձրանա 3-4 աստիճանով
ԵԽԽՎ պատգամավորներն ահազանգում են Ադրբեջանում քաղբանտարկյալների թվի աճի մասին
Քաղաքականություն
31.10.2022 | 18:16
ԵԽԽՎ 20 պատգամավոր առաջարկել է բանաձև ընդունել «Ադրբեջանում քաղբանտարկյալների թվի աճի վերաբերյալ»։ Այս մասին հայտնում է ադրբեջանական Թուրան գործակալությունը։
«Ադրբեջանում լրագրողների, իրավապաշտպանների ու ընդդիմադիրների նկատմամբ աճող հետապնդումները, քաղբանտարկյալների թվի աճը տագնապ է առաջացնում»,-ասվում է փաստաթղթում, որը ստորագրել են 13 երկրի 20 պատգամավորներ։ Նախաձեռնության հեղինակն Իտալիայից պատգամավոր Մաուրիցիո Բուքքարելան է։
Փաստաթղթում անդրադարձ կա լրագրող Ավազ Զեյնայլիի, իրավապաշտպան-փաստաբան Էլչին Սադիգովի ձերբակալությունը։ Նաև ասվում է, որ Ադրբեջանի իշխանություններն անտեսել են Եվրոպայի խորհրդի մարդու իրավունքների հանձնակատար Դունյա Միյատովիչի կոչը՝ անհապաղ ազատ արձակել նրանց։
2022թ-ի կեսերին բլոգեր Աբիդ Գաֆարովն էր բանտարկվել զրպարտության շինծու մեղադրանքով։ Նույն մեղադրանքով՝ երեք քրեական գործ էլ հարուցվել էր ընդդիմադիր Ալի Ալիևի նկատմամբ։ Մայիսին բլոգեր Ռաշադ Ռամազանովն էր ձերբակալվել շինծու մեղադրանքով։ «Խորհրդարանական վեհաժողովը պետք է ուշադիր քննարկի և ուսումնասիրի Ադրբեջանում քաղբանտարկյալների ձերբակալության դեպքերը»,- ասվում է փաստաթղթում։
Բանաձևի հեղիակները կարծում են, որ վեհաժողովը պետք է կոչ անի Ադրբեջանի կառավարությանը պահպանել մարդու իրավունքներն ու ազատ արձակել բոլոր քաղբանտարկյալներին։ Թե բանաձևը ԵԽԽՎ-ում երբ քննարկման կդրվի, դեռ հայտնի չէ։
Էմմա Չոբանյան
