Իրանն Ադրբեջանի անվտանգությունն իրենն է համարում․Աբդոլահիանը՝ Բայրամովին

Իրանի ԱԳ նախարար Հոսեյն Ամիր Աբդոլահիանը հեռախոսազրույց է ունեցել Ադրբեջանի իր գործընկերոջ՝ Ջեյհուն Բայրամովի հետ։ Իրանական Մեհր գործակալության փոխանցմամբ՝ զրույցում Աբդոլահիանը հավաստիացրել է Բայրամովին, որ Իրանը ինչպես միշտ իր ջանքերը կենտրոնացնում է Հայաստանի ու Ադրբեջանի միջև վեճերը դիվանագիտական ու տարածաշրջանային խողովակներով լուծելու վրա։

Կողմերը նաև կարծիքներ են փոխանակել երկկողմ հարաբերությունների, տարածաշրջանային և միջազգային ոլորտներում փոխադարձ հետաքրքրություն ներկայացնող հարցերի շուրջ։ Աբդոլահիանը անդրադարձել է Իրան-Ադրբեջան «լավ հարաբերություններին»՝  նշելով, որ Աստանայում երկու երկրների նախագահների վերջին հանդիպմանը պայմանավորվել են, որ պետք է հարգել տարածաշրջանի բոլոր երկրների, այդ թվում՝ Ադրբեջանի տարածքային ամբողջականությունը։

«Մենք միշտ հավատում ենք, որ արտաքին ուժերի ներկայությունը տարածաշրջանում հետագայում ավելի  է բարդացնում վեճերը և մենք այդ պատճառով դեմ ենք նրանց ներկայությանը»,-ասել է Իրանի ԱԳ նախարարը։

Նա նաև նշել է, որ տարածաշրջանի անվտանգությունը կենսական նշանակություն ունի տարածաշրջանի բոլոր երկրների համար և Իրանը Ադրբեջանի անվտանգությունը համարում է իր սեփական անվտանգությունը և դեմ է տարածաշրջանում օտար ուժերի  տեղակայմանը, որը տարածաշրջանի կայունությունն ու խաղաղությունը վտանգի տակ կդնի, ինչպես նաև տարածաշրջանային համագործակցությունը։

Ադրբեջանի արտգործնախարարն իր հերթին հեռախոսազրույցում ասել է, որ երկու երկրների արտգործնախարարների անմիջական և մշտական շփումը խորը երկկողմ հարաբերությունների նշան է։ Ըստ իրանական կողմի հաղորդագրության՝ Բայրամովը նաև բարձր է գնահատել, որ Աբդոլահիանը զանգահարել է իրեն  ու ներկայացրել Հայաստանի պաշտոնյաների հետ բանակցությունների  մանրամասները տարածաշրջանում խաղաղության ու կայնության հասնելու համար։

Նա նշել է, որ Ադրբեջանը ևս դեմ է օտար ուժերի տեղակայմանը  և  բարձրաձայնել է իր երկրի համաձայնությունը՝ շարունակելու տարածաշրջանային համագործակցությունը, այդ թվում՝ 3+3 ձևաչափով  հանդիպումները։

Էմմա Չոբանյան