13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Ստեփանակերտում հանրահավաքին մասնակցել է շուրջ 40,000 քաղաքացի
30.10.2022 | 20:15
Հոկտեմբերի 30-ին Արցախի խորհրդարանը պատգամավորների նախաձեռնությամբ արտահերթ նիստ է գումարել: Նիստին զուգահեռ Ստեփանակերտի Վերածննդի հրապարակում կայացել է մեծ հանրահավաք, որին մասնակցում էր շուրջ 40,000 քաղաքացի Ստեփանակերտից և շրջաններից: Այս մասին տեղեկացնում են ԱՀ ԱԺ-ից:
Նիստը մեկնարկել է ԱՀ ԱԺ նախագահ Արթուր Թովմասյանի՝ աշխարհի բոլոր երկրների առաջնորդներին ու ժողովուրդներին ուղղված ուղերձով.
«Այս փոքրիկ աշխարհատարածքը իրենից վտանգ չի ներկայացնում, բայց վտանգված է Արցախի ժողովրդի լիարժեք ապրելու ու գոյատևելու իրավունքը: Որպեսզի արցախցին ապրի, արարի, ստեղծագործի իր հայրենիքում, ճանաչե՛ք նրա ինքնորոշման իրավունքը»:
Խորհրդարանի ղեկավարը, անդրադառնալով հայոց պետականության և ազգային ինքնությանն ու լինելիությանը սպառնացող լուրջ վտանգներին, դիմել է նաև ողջ հայ ժողովրդին՝ միասնաբար նեցուկ կանգնել արցախահայությանը, շարունակել աջակցել նրա ազատագրական պայքարին, և հասնել նրա ինքնորոշման իրավունքի լիակատար իրացմանը:
Նիստի օրակարգում ԱՀ Ազգային ժողովի հայտարարություն ընդունելու մասին հարցն էր: Հայտարարության տեքստը ներկայացրել է ԱԺ պատգամավոր Արեգ Ավագյանը:
Մտքերի փոխանակությամբ հանդես են եկել պատգամավորներ Գեղամ Ստեփանյանը, Մարսել Պետրոսյանը, Արթուր Հարությունյանը, Արթուր Մոսիյանը և Մետաքսե Հակոբյանը:
Ազգային ժողովի հայտարարությունն ընդունվել է միաձայն:
Նիստի ավարտից հետո խորհրդարանականներն ու աշխատակազմի անդամները միացել են հանրահավաքին:
Հանրահավաքին մասնակցել է նաև Արցախի Հանրապետության նախագահ Արայիկ Հարությունյանն Արցախի երկրորդ ու երրորդ նախագահներ Արկադի Ղուկասյանի և Բակո Սահակյանի հետ:
