Մենք գործիքներ ունենք՝ թուրքական տնտեսական էքսպանսիային դիմադրելու. ապաքաղաքական զրույց Արսեն Ղազարյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է Հայաստանի Արդյունաբերողների և գործարարների միության նախագահ Արսեն Ղազարյանը: Նրա կարծիքով՝ 30 տարվա ընթացքում մեր երկրում գործարարների հանդեպ վերաբերմունքն աստիճանաբար փոխվում է: Չնայած դրան՝ շատերը դեռևս չեն հասկանում, որ հենց այդ խավն է, որ օգնել է մեր երկրի տնտեսությանը դիմայել դժվարին պայմաններում: Արսեն Ղազարյանը նաև նշում է, որ հատկապես վերջերս բարձրացել է գործարարների սոցիալական պատասխանատվությունը, նրանք ձգտում են ապահովել աշխատանքի համար նորմալ պայմաններ:

Գործարարի տեղեկացմամբ՝ չնայած 1993 թվականին Թուրքիան փակել է Հայաստանի հետ ցամաքային սահմանը, առևտրաշրջանառությունը Թուրքիայի հետ տարեցտարի աճում է: Թուրքական ապրանքներից ամբողջությամբ հրաժարվելը, ըստ նրա, իրատեսական չէ, քանի որ զարգացած երկրների բազմաթիվ ընկերություններ իրենց ապրանքներն արտադրում են Թուրքիայում, այդ երկրից են ներկրվում Հայաստանի համար խիստ անհրաժեշտ հումքն ու սարքավորումները: Որպեսզի սահմանների բացման դեպքում չլինի թուրքական տնտեսության էքսպանսիա, անհրաժեշտ է ունենալ լավ կազմակերպված տնտեսություն և համապատասխան օրենսդրական բազա:

Հաղորդման հյուրը համոզված է, որ երիտասարդ հայ գործարարները Հայաստանում ավելի ազատ են և անկաշկանդ, քան նախորդ սերունդը: Վերջինիս առաքելությունն է՝ ապահովել ժառանգականությունը, փոխանցել սեփական փորձը: Արսեն Ղազարյանի կարծիքով՝ առանց հիմնավոր կրթության ժամանակակից բիզնեսում հնարավոր չէ հաջողության հասնել: Այսօր գործարարը պետք է հոգ տանի ոչ միայն անձնապես իր, այլև իր աշխատակազմի կրթության մասին:

Մանրամասները տեսանյութում:

Արամ Աբրահամյան