09.10.2026 | 15:23
ԱԱԾ-ն հերքում է Մեղրիում ադրբեջանցիների լինելու լուրը // Ադրբեջաներեն երգ՝ Փաշինյանի տեսանյութում․ ԼՈՒՐԵՐ
Թուրքիայում քրդական լրատվամիջոցներում աշխատող 11 լրագրող է ձերբակալվել
Քաղաքականություն
26.10.2022 | 20:27
Թուրքական ոստիկանությունը նախօրեին ներխուժել է քրդամետ Mezopotamya լրատվական գործակալության և կանանց համար նախատեսված Jin News կայքի մի քանի լրագրողների տներն ու նրանց գրասենյակները: Անկարայի դատախազության կողմից իրականացվող հետաքննության շրջանակում մի քանի նահանգներում ոստիկանությունը բերման է ենթարկել 11 լրագրողի, գրում է Duvar-ը։
Նշվում է, որ ոստիկանությունը խուզարկել է Mezopotamya լրատվական գործակալության Անկարայի գրասենյակը և լրագրողների տները Ստամբուլում, Անկարայում, Ուրֆայում, Դիարբեքիրում, Վանում ու Մարդինում։ Խուզարկության ընթացքում ոստիկաններն առգրավվել են համակարգիչներ, կոշտ սկավառակներ, աշխատանքային այլ գործիքներ, ամսագրեր։ Ոստիկանությունը նաև առգրավել է լրատվական գործակալության խոսափողը։
Ոստիկանները ձերբակալել են լրագրողներ Զեմա Աղգյոզին, Դիրեն Յուրթսևերին, Սելման Գյոզելյուզին, Հաքան Յալչընին, Հաբիբե Էրենին, Դերյա Ռենին, Օզնուր Դեղերին, Էմրուլլահ Աջարին, Բերիվան Ալթանին, Ջեյլան Շահինլիին ու Մեհմեթ Գյունհանին, որոնք աշխատում են Mezopotamya News Agency-ում և Jin News-ում։
Թուրքիայի լրագրողների միությունը դատապարտել է այդ ձերբակալությունները՝ նշելով․ «Այս օրերին, երբ ուժի մեջ է մտել գրաքննության օրենքը, բազմաթիվ լրագրողների տներ են խուզարկվել, նրանց բերման են ենթարկել։ Փաստաբանների սահմանափակումներ են մտցվել մեր գործընկերների նկատմամբ, որոնց գրասենյակները նույնպես խուզարկվում են»։
Քրդամետ Ժողովուրդների դեմոկրատական կուսակցությունը ևս հայտարարություն է տարածել ՝ կոչ անելով անհապաղ ազատ արձակել լրագրողներին։
«MA-ի և JINNEWS-ի լրագրողների անօրինական կալանավորումները ցույց են տալիս ֆաշիզմի հասած ապօրինությունները։ Մենք խստագույնս դատապարտում ենք ազատ մամուլի աշխատողների դեմ այս հարձակումները. անհապաղ ազատ արձակել լրագրողներին։ Այս հարձակումները երեկ արդյունք չեն տվել և այսօր էլ արդյունք չեն տա», – ասվում է հայտարարության մեջ։
Էմմա Չոբանյան
