16.09.2026 | 16:54
Քաղցրաշենի մանկապարտեզի շենքում օձ է նկատվել․ երեխաներին տարհանել են
Լեհաստանի Սենատը ՌԴ-ում իշխող ռեժիմն ահաբեկչական է ճանաչել
Քաղաքականություն
26.10.2022 | 19:11
Լեհաստանի Սենատը Ռուսաստանի Դաշնությունում իշխող ռեժիմն ահաբեկչական է ճանաչել։ Որոշումն ընդունվել է միաձայն՝ 85 ձայնով, ասվում է Սենատի կայքում հրապարակված հաղորդագրությունում, փոխանցում է DW-ի ռուսական ծառայությունը։
Բանաձևում պատգամավորները խստորեն դատապարտել են Ռուսաստանի ագրեսիան Ուկրաինայի դեմ և կոչ են արել «բոլոր երկրներին, որոնք հանդես են գալիս խաղաղության, ժողովրդավարության և մարդու իրավունքների պաշտպանության օգտին, ճանաչել Ռուսաստանի Դաշնության իշխանությունը որպես ահաբեկչական ռեժիմ»:
Փաստաթղթում հիշեցվում է, որ Ռուսաստանի Զինված ուժերը դաժան պատերազմ են սանձազերծել Ուկրաինայի դեմ՝ «ցանկանալով ջնջել այս ինքնիշխան պետությունը երկրի երեսից և ոչնչացնել այս ազգը»։
Պատգամավորներն ընդգծել են, որ ուկրաինացիների կողմից իրենց երկրի անկախության հերոսական պաշտպանությունը հիացրել է ողջ ազատ աշխարհին, մինչդեռ ռուսական ուժերն ահաբեկում են ուկրաինական քաղաքների բնակիչներին և հարձակվում քաղաքացիական օբյեկտների վրա։
«Ռուսական համազգեստով «ավազակները» խոշտանգում և սպանում են օկուպացված տարածքներում զինվորականների և քաղաքացիական անձանց, առևանգում ուկրաինացի երեխաներին, արտաքսում և վերաբնակեցնում ուկրաինացիներին»,- ասվում է բանաձևում։
Հոկտեմբերի կեսերին նման որոշում էր կայացրել նաև ԵԽԽՎ-ն։
Տաթև Ֆռանգյան
