Թուրքիայում բժշկի են ձերբակալել՝ թուրքական ԶՈՒ-ի կողմից քիմիական զենքի կիրառման պնդումները հետաքննելու կոչի համար

Թուրքիայում ոստիկանությունը ձերբակալել է երկրի Բժշկական ասոցիացիայի նախագահ Սեբնեմ Քորուր Ֆինջանջիին այն բանից հետո, երբ նա կոչ է արել հետաքննել պնդումները, որ թուրքական զինուժը քիմիական զենք է կիրառել հյուսիսային Իրաքում քուրդ զինյալների դեմ, հայտնում է Ahval գործակալությունը։

Անկարայի Գլխավոր դատախազության համաձայն՝ բժիշկ Սեբնեմ Քորուր Ֆինջանջին ձերբակալվել է «ահաբեկչական քարոզչություն տարածելու» մեղադրանքով՝ հակաահաբեկչական ոստիկանության կողմից սկսված հետաքննության շրջանակում։

63-ամյա դատաբժշկական փորձագետն իր կարիերայի մեծ մասն անցկացրել է խոշտանգումները և դաժան վերաբերմունքը փաստագրելով և հանդիսանում է առաջատար իրավապաշտպան և ակտիվիստ Թուրքիայում: Նա նաև Թուրքիայի Մարդու իրավունքների հիմնադրամի նախագահն է եղել։

Թուրքական լրատվականները գրում են, որ նա ձերբակալվել է Ստամբուլում վաղ առավոտյան՝ իր տանը և տեղափոխվել Անկարա, որտեղ Գլխավոր դատախազությունը նրա դեմ հետաքննություն է սկսել անցյալ շաբաթ:

Թուրք պաշտոնյաները հերքում են քուրդ զինյալների պնդումները, որ թուրքական զորքերը քիմական զենք են կիրառել Քուրդիստանի աշխատավորական կուսակցության (PKK) դեմ Հյուսիսային Իրաքում՝ պնդելով, որ զինվորականները նման զենք չունեն:

Քրդամետ լրատվամիջոցներից մեկին տված մեկնաբանությունում դոկտոր Ֆինջանջին ասել է, որ ինքը ստուգել է մի տեսանյութ, որը ցույց է տալիս քիմիական զենքի օգտագործումը, և կոչ է արել «արդյունավետ հետաքննություն» իրականացնել:

«Ակնհայտ է, որ օգտագործվել է թունավոր քիմիական գազերից մեկը, որն ուղղակիորեն ազդում է նյարդային համակարգի վրա», – ասել է նա՝ սոցիալական ցանցերում կիսվելով քիմիական պատերազմը ցուցադրող լուսաբանումների հիման վրա իր հետազոտություններով: Նա նաև կոչ է արել անկախ առաքելություններին՝ հետաքննել միջադեպը միջազգային պայմանագրերի շրջանակում:

Հարցազրույցից հետո Ֆինջանջին հայտնվել է կառավարամետ լրատվամիջոցների թիրախում, ինչը հանգեցրել է իրավական հետաքննության՝ «ահաբեկչական քարոզչություն տարածելու» և «թուրքական ազգին, Թուրքիայի Հանրապետությանը և նրա կառույցներին վիրավորելու» հիմքով։

Էմմա Չոբանյան