05.11.2024 | 23:30
ԱՄՆ նախագահական ընտրությունների արդյունքները դժվար թե վերականգնեն Թուրքիայի հետ հարաբերությունները. անդրադարձ
Ոչ մի երկիր չպետք է օգնի Ռուսաստանի Դաշնությանը․ Ստոլտենբերգ
Քաղաքականություն
26.10.2022 | 18:13
Աշխարհի ոչ մի երկիր չպետք է օգնի ագրեսորին անօրինական պատերազմում, հայտարարել է ՆԱՏՕ-ի գլխավոր քարտուղար Յենս Ստոլտենբերգը՝ մեկնաբանելով Ռուսաստանին իրանական անօդաչու սարքերի մատակարարումը։ Այս մասին նա ասել է ամերիկյան «Ջորջ Բուշ» ավիակիր նավի վրա, որն այս պահին մասնակցում է Միջերկրական ծովում ՆԱՏՕ-ի Neptune Strike 2022 զորավարժություններին, ասված է ՆԱՏՕ-ի կայքէջում, փոխանցում է korrespondent-ը։
«Վերջին օրերին մենք նաև տեսանք, որ Իրանը ռազմական աջակցություն է ցուցաբերում ռուսական ռազմական ջանքերին։ Դա անընդունելի է, ոչ մի երկիր չպետք է օգնի ագրեսորին անօրինական պատերազմում: Ուստի ես ողջունում եմ դաշնակիցների եւ Եվրամիության կողմից Թեհրանի դեմ խիստ պատժամիջոցների կիրառումը»,- ասել է նա։
Ստոլտենբերգի խոսքով՝ Ուկրաինայի դեմ Ռուսաստանի պատերազմն «առանցքային փուլում է»։
«Նախագահ Պուտինը պատերազմի դաշտում իր անհաջողություններին պատասխանում է ավելի ագրեսիվությամբ՝ հարձակումներ խաղաղ բնակչության, քաղաքացիական էներգետիկ ենթակառուցվածքների վրա, ինչպես նաև անօդաչու թռչող սարքերի ու հրթիռների հարվածներ բնակելի թաղամասերին: Այժմ Ռուսաստանը կեղծ պնդում է, որ Ուկրաինան պատրաստվում է իր տարածքում ռադիոլոգիական «կեղտոտ ռումբ» կիրառել։ ՆԱՏՕ-ի դաշնակիցները մերժում են այս բացահայտ կեղծ հայտարարությունը»,- ասել է գլխավոր քարտուղարը։
Նա ևս մեկ անգամ հայտարարել է, որ ՆԱՏՕ-ն Ուկրաինայի պատերազմի մասնակից չէ, սակայն կշարունակի աջակցել ուկրաինացիների ինքնապաշտպանության իրավունքին այնքան ժամանակ, որքան անհրաժեշտ է։
Ավելի վաղ Ստոլտենբերգը հայտարարել էր, որ ՆԱՏՕ-ն պետք է ավելացնի ամեն ինչի մատակարարումը, որպեսզի ուկրաինացիները կարողանան պայքարել ամբողջ ձմեռ, այսինքն՝ գեներատորներ, ձմեռային հագուստ և վրաններ։
Տաթև Ֆռանգյան
