28.04.2025 | 23:29
Ատելության խոսքը ոչ միայն Հայաստանում, այլև ամբողջ աշխարհում ամենավտանգավոր երևույթներից է. ՄԻՊ
Բաքվում ոստիկանությունը ուժով ցրել է ընդդիմության հանրահավաքը․ շուրջ 100 մարդ է ձերբակալվել․ ԼՈՒՍԱՆԿԱՐՆԵՐ
Քաղաքականություն
24.10.2022 | 19:11
Բաքվի քաղաքապետարանի դիմաց ընդդիմության կազմակերպած հանրահավաքն ավելի քան 40 րոպե է տևել, որն ուղեկցվել է ոստիկանական բռնություններով ու ձերբակալություններով, գրում են տեղական լրատվամիջոցները։
Ակցիան նախատեսված էր ժամը 16:00-ին, սակայն դրանից մեկ ժամ առաջ ոստիկանական ուժերը շրջափակել են քաղաքապետարանի հարակից տարածքը։ Քաղաքապետարանի ուղղությամբ հետիոտնի ճանապարհի երկու կողմերում կենտրոնացած են եղել ոստիկանության մեծաթիվ աշխատակիցներ։ Մեծ թվով ոստիկանական մեքենաներ և երկու հատուկ ավտոբուսներ տեղափոխվել են մետրոյի «Իչերի Շեհեր» կայարան։ Տեղական ժամանակով 15։40-ին ոստիկանությունը սկսել է բերման ենթարկել բոլորին, որոնք հայտնվել ու զրուցել են լրագրողների հետ մետրոյի կայարանի դիմաց, այդ թվում՝ կանանց։
Ակցիայի մասնակիցները նոր մարտավարություն են կիրառել՝ ակցիայի վայրում հայտնվել են հերթով, ոչ թե խմբերով։ Այնուհետև ցուցարարները սկսել են հայտնվել 4-6 և ավելի հոգանոց խմբերով՝ վանկարկելով «Ազատություն», «Հրաժարական», «Ազատություն քաղբանտարկյալներին»։ Սրա շնորհիվ ոստիկանները չեն կարողացել բոլորին միանգամից բերման ենթարկել։
Ցուցարարներին ձերբակալել ու տեղափոխել ոստիկանական մեքենաներ և հատուկ ավտոբուսներ, սակայն դրանք չեն բավարարել, և նոր մեքենաներ են բերվել ակցիայի վայր։ Ոչ պաշտոնական տվյալներով՝ շուրջ 100 մարդ է ձերբակալվել։
Հիշեցնենք, որ իրավապահները դեռևս առավոտից էին սկսել ձերբակալել հավաքի կազմակեպիչներին։ Ակցիայի մասնակիցները պահանջում են ժողովրդավարական բարեփոխումներ, հավաքների ազատություն, քաղբանտարկյալների ազատ արձակում, ազատ ընտրություններ, հիմնարար բարեփոխումներ և ցամաքային սահմանների բացում։
Էմմա Չոբանյան
