Անկարան չի երկարաձգում ամերիկյան ընկերության հետ F-35-երի ծրագրի լոբբիստական պայմանագիրը

Թուրքիան չի երկարաձգել պայմանագիրը Վաշինգտոնի ամենահեղինակավոր իրավաբանական ընկերություններից մեկի՝ Arnold & Porter Kaye Scholer-ի հետ՝ օգոստոսի 16-ին պայմանագրի ավարտից հետո իր մասնակցությունը F-35 կործանիչների ծրագրին լոբբինգ անելու համար: Այս մասին հայտնում է Turkish Minute-ը՝ վկայակոչելով իրավաբանական գրասենյակին։

2021 թվականի փետրվարին Թուրքիայի պետական պաշտպանական արդյունաբերության տեխնոլոգիաներ ընկերությունը (SSTEK), որն ամբողջությամբ պատկանում է Պաշտպանական արդյունաբերության նախագահությանը (SSB), 750,000 դոլար արժողությամբ 6-ամսյա լոբբիստական պայմանագիր էր կնքել Վաշինգտոնում գործող ընկերության հետ՝ F-35-երի ծրագրում մնալ փորձելու համար։

Եվս մեկ պայմանագիր էլ Անկարան ստորագրել էր Arnold & Porter-ի հետ 2021 թվականի սեպտեմբերին, որը պետք է «ռազմավարական խորհրդատվության և իրավաբանական խորհրդատվության ծառայություններ» տրամադրեր կառավարությանը։

Հավելենք, որ ԱՄՆ-ը 2020թ․ դեկտեմբերին Թուրքիայի դեմ պատժամիջոցներ է սահմանել ռուսական C-400 համակարգերի գնման պատճառով։ 2021-ի ապրիլին էլ Վաշինգտոնը Թուրքիային պաշտոնապես հեռացրել է F-35 կործանիչների մշակման ու պատրաստման ծրագրից։ Վաշինգտոնը նշում է, որ C-400-ները վտանգ են ներկայացնում իր F-35 կործանիչների և ՆԱՏՕ-ի ավելի լայն պաշտպանական համակարգերի համար: Թուրքիան հերքում է սա՝ նշելով, որ C-400-ները չեն ինտեգրվի ՆԱՏՕ-ին։

Թուրքիայի պաշտպանական արդյունաբերության տնօրեն Իսմայիլ Դեմիրը 2021-ի մայիսին ասել էր, որ Անկարայի և Վաշինգտոնի միջև երկխոսություն կսկսվի՝ լուծում գտնելու այն խնդիրների համար, որոնք ծագել են F-35 կործանիչների ծրագրից Թուրքիայի դուրս մնալու պատճառով։

Փորձագետներն Անկարայի վերջին քայլում նշան են տեսնում, որ ծրագրին միանալու Թուրքիայի հույսերը մարել են։

Էմմա Չոբանյան