15.04.2026 | 16:44
Փաշինյանը ներկա է գտնվել եզդիական համայնքի Նոր տարվան նվիրված միջոցառմանը
Ֆրանսիայում համընդհանուր գործադուլ է
Քաղաքականություն
18.10.2022 | 18:30
Ֆրանսիայում համընդհանուր գործադուլ է սկսվել, որին մասնակցում են մի շարք ոլորտների աշխատողներ, պետական ծառայողներ, երիտասարդական կազմակերպություններ և ուսանողներ, հայտնում է Le Figaro-ն։
TotalEnergies-ի և ExxonMobil-ի նավթավերամշակման գործարանների և պահեստների աշխատողներից բացի, որոնք արդեն մի քանի շաբաթ գործադուլ են անում՝ պահանջելով բարելավել աշխատանքային պայմանները, գործադուլ են սկսել նաև տրանսպորտի աշխատողները, մասնավորապես՝ երկաթուղային օպերատոր SNCF-ի և RATP-ի (Փարիզի տրանսպորտի ինքնավար գործակալություն) աշխատակիցները։
Արդյունքում մետրոյի որոշ երթուղիներով գնացքների տեղաշարժի ընդհատումներ են գրանցվել, չեղարկվել է մերձքաղաքային գնացքների մոտ մեկ քառորդի երթևեկը։ Սպասվում է նաև, որ այսօրվա գործադուլի պատճառով Ֆրանսիայի տարածքով միջքաղաքային գնացքների երթևեկության մոտ կեսը չի իրականացվի։
Այսօր Փարիզում չեղարկվել է նաև 9 ավտոբուսային երթուղիներով շարժը։ SNCF-ի աշխատակիցները գործադուլը կշարունակեն չորեքշաբթի, մինչդեռ RATP-ի ներկայացուցիչները հրաժարվում են շարունակել գործադուլը՝ նշելով, սակայն, որ իրենք դեռ աջակցում են շարժմանը և կարող են նոյեմբերին վերադառնալ գործադուլներին։
Բացի այդ, ըստ Կրթության նախարարության, համընդհանուր գործադուլին միացել է երկրի պրոֆեսորադասախոսական կազմի մոտ 6%-ը։ Դասադուլին մասնակցում են նաև որոշ ուսանողներ՝ փակելով ճեմարանների և բուհերի մուտքերը։
Տաթև Ֆռանգյան
