09.10.2026 | 17:52
Գոյություն չունեցող ընկերությունները հաղթել են 80 մրցույթում և խափանել 3,2 մլրդ դրամի գնումներ․ ՊՎԾ
Կանադան պատժամիջոցներ է սահմանել ՌԴ 34 պրոպագանդիստների ու դերասանների դեմ
Քաղաքականություն
18.10.2022 | 15:32
Կանադան պատժամիջոցներ է սահմանել ՌԴ 34 քաղաքացու նկատմամբ, որոնք, ըստ այդ երկրի ԱԳՆ-ի, առնչվում են «ռուսական ապատեղեկատվության տարածման և քարոզչության հետ»։ Այս մասին գրում է DW-ի ռուսական ծառայությունը՝ վկայակոչելով Կանադային ԱԳՆ հաղորդագրությունը։
Պատժամիջոցների ցանկում են հայտնվել, մասնավորապես, մեդիամենեջեր Թինա Կանդելակին, «Մոսկովսկի կոմսոմոլեց»-ի գլխավոր խմբագիր Պավել Գուսևը, «Առաջին ալիքի» տեղեկատվական հաղորդումների բաժնի տնօրեն Կիրիլ Կլեյմենովը, հեռուստահաղորդավարներ Անդրեյ Կոնդրաշովը, Նաիլյա Ասկերզադեն, Անատոլի Կուզիչևը, Օլեսյա Լոսևան, Անդրեյ Դոբրովը, Դմիտրի Գուբերնիևը, լրագրողներ Ալեքսանդր Գամովը և Ալեքսանդր Կոցը։
Բացի այդ, պատժամիջոցներ են կիրառվել նաև դերասաններ Սերգեյ Բեզրուկովի, Վլադիմիր Մաշկովի, Դմիտրի Պևցովի, ՌԴ նախագահի օգնական Վլադիմիր Մեդինսկու, «Ռոսնեֆտի» մամուլի քարտուղար Միխայիլ Լեոնտևի, «Նոր մարդիկ» կուսակցության առաջնորդ Ալեքսեյ Նեչաևի նկատմամբ։ Պատժամիջոցներ են սահմանել նաև ՊՆ-ի կողմից վերահսկվող «Զվեզդա» հեռուստաալիքի նկատմամբ։
«Ռուսական ռեժիմի պատերազմը կախված է ստից ու խաբեությունից։ Այն փակում է սեփական քաղաքացիների բերաններն ու բանտարկում, որոնք համարձակվում են ասել ճշմարտությունը։ Քանի որ Ռուսաստանի կողմից մարդու իրավունքների խախտումները շարունակում են աճել, Կանադան քայլեր է ձեռնարկում՝ հակազդելու քարոզչությանը, որը փորձում է արդարացնել դրանք»,- ասվում է ԱԳ նախարար Մելանի Ժոլիի հայտարարության մեջ։
Պատժամիջոցները սառեցնում են ռուսաստանցիների ցանկացած ակտիվներ Կանադայում և արգելում կանադական ֆինանսական հաստատություններին ծառայություններ մատուցել նրանց: Բացի այդ, արգելվում է պատժամիջոցների ենթարկված անձանց մուտքը Կանադա։
Էմմա Չոբանյան
