01.07.2026 | 02:54
ԱԱ-2026. Ֆրանսիան խնդիրներ չունեցավ, Մբապեի դուբլը. ՏԵՍԱՆՅՈՒԹ
Ուկրաինայում ռուսական ագրեսիայի բնույթը փոխվել է․ Բլինքեն
Քաղաքականություն
18.10.2022 | 12:34
ԱՄՆ պետքարտուղար Էնթոնի Բլինքենը հայտարարել է, որ Ուկրաինայում ռուսական ագրեսիայի բնույթը փոխվել է, սակայն ԱՄՆ-ն անում է «ամեն ինչ՝ օգնելու ուկրաինացիներին պաշտպանվել», գրում է VOA-ն։ «Փետրվարի 24-ից ագրեսիայի բնույթը փոխվել է», – լրագրողներին ասել է Բլինքենը: «Այն տեղափոխվել է այլ վայրեր, այլ տարածքներ, տարբեր զենքեր են օգտագործվում»: Նա քաղաքացիական օբյեկտների վրա ռուսական հարձակումները հուսահատության ակտ է անվանել։
«Նրանք հարձակվում են խաղաղ բնակչության վրա», – ասել է պետքարտուղարը: «Նրանք հարձակվում են այնպիսի կարևոր ենթակառուցվածքների վրա, ինչպիսիք են էլեկտրակայանները, հիվանդանոցները, որոնց կարիքն ունեն մարդիկ իրենց առօրյա կյանքում, և ռազմական օբյեկտներ չեն: Սա Ռուսաստանի աճող հուսահատության նշան է, բայց նաև ցուցիչ այն բանի, թե որքան կարող են իջնել»:
«Մենք ցանկանում ենք համոզվել, որ անում ենք ամեն ինչ, որպեսզի օգնենք ուկրաինացիներին պաշտպանվել այս ագրեսիայից, նույնիսկ այն դեպքում, երբ նրանք ռուսներին դուրս են մղում Ռուսաստանի կողմից օկուպացված տարածքներից», – հավելել է նա:
Բլինքենը հիշեցրել է նաև, որ նույնիսկ պատերազմի սկսվելուց առաջ նախագահ Ջո Բայդենը փորձել է համոզվել, որ ուկրաինացիներն ունեն այն գործիքները, որոնք անհրաժեշտ են ռուսական ագրեսիայի դեմ պայքարելու համար։
«Արդյունքում, երբ Ռուսաստանը ներխուժում իրականացրեց, ուկրաինական կողմն ուներ անհրաժեշտ գործիքներն ագրեսիան հետ մղելու համար, հատկապես Կիևի շուրջ», – ասել է Բլինքենը: «Առաջին հերթին դա տեղի ունեցավ նրանց անհավանական քաջության պատճառով, բայց նաև այն պատճառով, որ մենք փորձեցինք համոզվել, որ նրանք ունեն այն ամենը, ինչ անհրաժեշտ է դրա դեմ պայքարելու համար»:
