Հրդեհ իրանական բանտում, որտեղ պահվում են հարյուրավոր քաղբանտարկյալներ

Իրանի խոշոր Էվին բանտում, որտեղ քաղբանտարկյալներ են պահվում, հրդեհի հետևանքով 4 մարդ է զոհվել, 61-ը՝ վիրավորվել։ BBC-ի ռուսական ծառայության փոխանցմամբ՝ սա Իրանի իշխանությունների պաշտոնական տվյալներն են։ Հրդեհը բռնկվել է նախօրեին։ Իրանի իշխանությունները տեղի ունեցածի համար մեղադրում են բանտարկյալներին:

Պետական լրատվական գործակալության վարկածով՝ հրդեհի պատճառը հրկիզումն է եղել. բանտի արհեստանոցներից մեկը հրկիզել են «ֆինանսական հանցագործությունների և գողության համար դատապարտված մի քանի բանտարկյալների միջև ծեծկռտուքից հետո»: BBC-ն չի կարող հաստատել այդ վարկածը։

Որոշ քաղաքական բանտարկյալներ կարողացել են կապ հաստատել իրենց ընտանիքների հետ, որպեսզի տեղեկացնեն, որ նրանց հետ ամեն ինչ կարգին է։ Նրանցից մեկը BBC-ի պարսկական ծառայությանը պատմել է, որ բանտային հիվանդանոցում չորս մարմին է տեսել, սակայն նա կարծում է, որ զոհվածների թիվը, հավանաբար, ավելի մեծ է: Նրա վարկածը հակասում է պաշտոնականին, որի համաձայն՝ բանտարկյալները մահացել են ծխից թունավորումից. նա ասում է, որ ոմանք սպանվել են կամ տուժել արցունքաբեր գազի ազդեցությունից:

Իրանում արդեն մեկ ամիս է՝ չեն դադարում բողոքի ակցիաները, որոնք սկսվել են 22-ամյա Մախսա Ամինիի մահվանից հետո: Դա մի քանի տասնամյակների ընթացքում Իրանում հասարակական դժգոհության ամենամեծ ալիքն է և լուրջ մարտահրավեր երկրի իշխանությունների համար:

Ոչ պաշտոնական տվյալներով ՝ բողոքի ակցիաներում ձերբակալված հարյուրավոր ընդդիմադիրներ պատիժ են կրում հենց այդ բանտում։