Գյումրու պատվավոր քաղաքացու կոչում՝ վաստակավոր ճարտարապետ Սաշուր Քալաշյանին

Գյումրու ավագանին հոկտեմբերի 14-ի նիստում միաձայն քվեարկությամբ «Գյումրու պատվավոր քաղաքացի» կոչում շնորհեց ՀՀ վաստակավոր ճարտարապետ Սաշուր Հրայրի Քալաշյանին։ Քալաշյանը 18 տարի շարունակ՝ 1976-94 թթ.-ին եղել է Գյումրու գլխավոր ճարտարապետը։ Առաջարկը ավագանուն ներկայացրեց Գյումրու ներկայիս գլխավոր ճարտարապետ Հենրիկ Գասպարյանը։ Դեռ ելույթը չսկսած՝ ավագանու անդամները, լսելով Սաշուր Քալաշյանի անունը, սկսեցին ծափահարել։

«Նա ծնունդով գյումրեցի է և իր ամբողջ կյանքը նվիրել է Գյումրիին և Գյումրու զարգացմանը։ Նա Հայաստանի ամենաառաջատար ճարտարապետներից մեկն է և մեծ լումա ունի ինչպես հայկական ճարտարապետության զարգացման, այնպես էլ մեր քաղաքի ճարտարապետության զարգացման, մշակույթի պահպանման հարցում»,-ասաց Հենրիկ Գասպարյանը։

Գյումրու ավագանու անդամները ոչ միայն միաձայն կողմ քվեարկեցին, այլև հոտնկայս ծափահարեցին։

Սաշուր Քալաշյանը Գյումրիում նախագծել ու կառուցել է Սերգեյ Մերկուրովի, Ասլամազյան քույրերի թանգարանների շենքերը, մանկական ստեղծագործության կենտրոնի, տիկնիկային թատրոնի պատմաճարտարապետական հուշարձանները, Ձիթողցյանների տունը, ինչպես նաև «Կումայրի» պետական պատմաճարտարապետական արգելոց-թանգարանը։ Իսկ Երևանում նրա համահեղինակությամբ նախագծվել ու կառուցվել են Մեծ եղեռնի հուշահամալիրը, Հայոց ցեղասպանության թանգարան-ինստիտուտը։

Ավագանու որոշման մեջ ասված է․ «Գյումրի քաղաքի կառուցապատման, պատմամշակութային ժառանգության պահպանման, վերականգնման, ճարտարապետության և քաղաքաշինության զարգացման մեջ ներդրած նշանակալի ավանդի, երկարամյա բեղմնավոր գործունեության և ունեցած վաստակի համար Գյումրի համայնքի ավագանու որոշմամբ «Գյումրու պատվավոր քաղաքացի» կոչում շնորհվեց Հայաստանի Հանրապետության վաստակավոր ճարտարապետ, ծնունդով գյումրեցի (1977-1992թթ, Լենինականի գլխավոր ճարտարապետ) Սաշուր Քալաշյանին»։

Արմիկ Մովսիսյան