Քաղաքականություն
14.10.2022 | 21:03
Թուրքիայի նախագահ Ռեջեփ Թայիփ Էրդողանն ընդունել է գազային հանգույցի ստեղծման մասին ՌԴ նախագահ Վլադիմիր Պուտինի առաջարկը՝ նշելով, որ Թուրքիայի հյուսիսարևմուտյան Թրակիա շրջանը կարող է դառնալ դեպի Եվրոպա նոր գազային հանգույցի համար ամենահարմար վայրը, գրում է Անադոլու գործակալությունը։
Աստանայից վերադառնալիս լրագրողների հետ զրույցում Էրդողանն ասել է, որ Թուրքիայի Էներգետիկայի և բնական պաշարների նախարարությանը և ռուսական կողմից համապատասխան գերատեսչություններին հանձնարարվել է համատեղ քայլեր մշակել այդ ուղղությամբ։
«Գազային հանգույցի համար կորոշվի ամենահարմար տեղը։ Թուրքիան արդեն ունի գազային հանգույց, որն աշխատում է ներքին կարիքների բավարարման համար։ Իսկ ահա նոր հանգույցն ուղղված է լինելու միջազգային մատակարարումներին։ Թուրքիայի Էներգետիկայի և բնական պաշարների նախարարությունն ու ռուսական գերատեսչությունները միասին կաշխատեն և արդյունքները կներկայացնեն մեզ, որից հետո կոնկրետ քայլեր կձեռնարկվեն։ Մենք ուշացումներ չենք նախատեսում»,- ասել է Էրդողանը։
Հավելենք, որ նախօրեին Աստանայում տեղի է ունեցել Թուրքիայի նախագահ Ռեջեփ Թայիփ Էրդողանի ու ՌԴ նախագահ Վլադիմիր Պուտինի հանդիպումը, որի ընթացքում ռուսական կողմը Անկարային առաջարկել է գազային հանգույց ստեղծել Եվրոպա մատակարարումների համար։
Պուտին-Էրդողան հանդիպումից հետո ՌԴ նախագահի մամուլի խոսնակ Դմիտրի Պեսկովը հայտարարել է, թե երկու նախագահները հանձնարարել են մանրամասն ու շատ արագ մշակել գազային հանգույցի ստեղծման հարցը։
Էմմա Չոբանյան
