01.07.2026 | 11:41
Մեկ օրում բացահայտվել է 74 հանցագործություն
Բոլոր զինապարտները պետք է մասնակցեն 25-օրյա հավաքներին. ՊՆ նոր նախագիծը․ ՏԵՍԱՆՅՈւԹ
Քաղաքականություն
13.10.2022 | 20:10
Վարչապետ Նիկոլ Փաշինյանն այսօր Կառավարության հերթական նիստի ժամանակ հայտարարեց, որ որոշում են կայացրել հրաժարվել եռամսյա հավաքներ անցկացնելու պրակտիկայից: Ըստ Փաշինյանի՝ եռամսյա ժամկետը խնդիրներ է առաջացնում աշխատող պահեստազորայինների համար:
Որպես այլընտրանք՝ Կառավարությունն առաջարկում է դյուրացնել համակարգը․ նախ՝ ժամկետը կրճատել մինչև 25 օր։ Բացի այդ, մասնակիցներն իրենք կարող են ընտրել, թե տարվա որ ժամանակահատվածում մասնակցեն հավաքներին: Պաշտպանության նախարար Սուրեն Պապիկյանն իրավապահների ուշադրությունը հրավիրեց կազմակերպչական գործընթացի ուղղությամբ՝ շեշտելով՝ 25-օրյա հավաքները պարտադիր են լինելու բոլոր զինապարտների համար:
Եռամսյա հավաքների ընթացքում գրանցվող խնդիրները, որոնք մատնանշում էր Փաշինյանը, դեռևս նախորդ տարվանից բարձրաձայնում են հավաքի մասնակիցները:
Քաղաքագետ Արմեն Վարդանյանը, որը մասնակցել է 2021 թվականի օգոստոս-նոյեմբեր ժամանակահատվածում անցկացված եռամսյա հավաքին, շեշտում է՝ հավաքներին մասնակցելը շատ կարևոր է պատերազմական վիճակում գտնվող երկրի համար: Նա, սակայն, ընդգծում է՝ պետությունը չէր հոգում հավաքի այն մասնակիցների խնդիրները, որոնք պետական համակարգի աշխատողներ չեն և զբաղված են մասնավոր սեկտորում։ Ակնկալիք կա, որ հարցը կլուծվի նոր փոփոխությամբ:
Հատկանշական է, որ Պաշտպանության նախարարության կողմից պարբերաբար ներկայացվող հավաքների մասին նախագծում որպես հիմնավորում նշվում է, որ հավաքների նպատակը պահեստազորի ռազմական ունակությունների կատարելագործումն է, մասնագիտական վերապատրաստումը․ «Զինված ուժերը վերջին տարիներին համալրվել է նոր սպառազինությամբ ու ռազմական տեխնիկայով, ինչպես նաև իրականացվում են կառուցվածքային բարեփոխումներ, ինչի համար անհրաժեշտ է վերապատրաստել պահեստազորին: Անհրաժեշտ ենք համարում ունենալ մարտունակ ստորաբաժանումներ, ինչի համար պահեստազորի վերապատրաստման գործընթացը կրելու է շարունակական բնույթ և հետագա տարիներին ընդգրկելու է նոր ստորաբաժանումներ և նոր պահեստազորայիններ»:
Սակայն արդյո՞ք 25 օրը բավական կլինի՝ ծանոթանալու նոր տեխնիկային և վերապատրաստվել․ իշխանական «Քաղաքացիական պայմանագիր» խմբակցության պատգամավոր Վիլեն Գաբրիելյանն այս հարցին դրական է պատասխանում:
Թեև նախագիծը դեռ դրական արձագանքներ է ստացել ինչպես օրերի քանակի կրճատման, այնպես էլ ժամանակահատվածի կամընտրականության մասով, այնուամենայնիվ, կրկին մտավախություն կա՝ բոլորը չէ, որ կմասնակցեն անգամ 25-օրյա հավաքներին:
Մանրամասները՝ տեսանյութում։
Ռոզա Վարդանյան
