«Սատանի անիվի» հետքերով․ կարուսելը դեռ չի շահագործվում, քաղաքապետն ասում է՝ այն ապօրինի է․ ՏԵՍԱՆՅՈւԹ

Արդեն մի քանի ամիս է՝ Երևանի տարբեր հատվածներից տեսանելի է «Հաղթանակ» զբոսայգում կառուցված նոր ատրակցիոնը, այսպես կոչված, «սատանայի անիվը»։ Թեև այն կառուցվել է այս տարվա սկզբին, այնուամենայնիվ, Երևանի քաղաքապետարանի ուշադրությանն արժանացել է վերջերս։ Պարզվում է՝ ատրակցիոնի կառուցման համար քաղաքապետարանը թույլտվություն չի տրամադրել, և այն ապօրինի է։

Ինչպե՞ս է ստացվել, որ Երևանի կենտրոնում, բոլորի աչքի առաջ հսկայական ատրակցիոն է կառուցվել՝ վրիպելով պատկան մարմինների աչքից։ Արդյո՞ք այն անցել է համապատասխան տեխնիկական զննություն, և երբ կհանձնվի շահագործման։ Այս հարցերի պատասխանները փորձեցինք ստանալ հենց «Հաղթանակ» զբոսայգում։ Factor TV-ի նկարահանող խմբին դիմավորեց տարածքի մենեջերը՝ հրաժարվելով որևէ հարցի պատասխանել։ Նրա խոսքով՝ զբոսայգու տնօրենն արձակուրդում է, իսկ փոխտնօրենը՝ արտերկրում։

«Մեզ հարցը ներկայացված է, մեր տնօրենը բոլոր հարցերին պատշաճ կերպով պատասխանել է, և ներկայացվել է քաղաքապետարան, որի մասին շուտով, կարծում եմ, դուք էլ կիրազեկվեք»,- նշեց տարածքի մենեջեր ներկայացած Սյուզաննա Բաղդասարյանը։

Նա մեզ հորդորեց հարցերն ուղղել գրավոր՝ խոստանալով պատասխանել դրանց մինչև օրվա ավարտը, սակայն դրանք գրավոր ստանալուց 2 օր անց դեռևս պատասխան չկա։

Այնուամենայնիվ, տարածքի մենեջերը, որը հրաժարվեց նկահարանվելուց, մեզ հետ բանավոր զրույցում նշեց, որ ատրակցիոնը շահագործման չի հանձնվի այս տարի՝ սեզոնի ավարտով և աշխատանքների անավարտ լինելով պայմանավորված։ Նրա խոսքով՝ զբոսայգում գործող նմանատիպ ատրակցիոնն արդեն հին է, և նորը կառուցվել է՝ այն փոխարինելու համար։

Factor.am-ը կապ հաստատեց նաև ԱԻՆ «Տեխնիկական անվտանգության ազգային կենտրոն» ՊՈԱԿ-ի փորձագիտական լաբորատրիայի պետ Մարտին Ասլանյանի հետ։ Նրա խոսքով՝ ատրակցիոնի կառուցման համար փորձաքննությունը բաղկացած է 3 փուլից։ Առաջին փուլը նախագծային փաստաթղթերի փորձաքննությունն է, որի վերաբերյալ տեսչական մարմինը դրական եզրակացություն է տվել։

«2-րդ փուլով տրվում է տեխնիկական անվտանգության փորձաքննություն։ Մենք արդեն ստացել ենք դիմումը, ընթացք ենք տվել, ամսի 10-ին ենք ստացել այդ դիմումը։ Դա վերջացնելուց հետո արդեն պետք է ստանանք 3-րդ դիմումը, որը տրվելու է նախագծային փաստաթղթերի վերաբերյալ գործարկվող եզրակացություն, որով արդեն տալու ենք փորձաքննության եզրակացություն նախագծի փաստաթղթերի վերաբերյա»,- նշեց ԱԻՆ ներկայացուցիչը։

Երևանի քաղաքապետարանի հոկտեմբերի 3-ի գործակարգավարական նիստում քաղաքապետը հայտարարել էր, թե Երևանի «Հաղթանակ» զբոսայգում նոր կառուցված ատրակցիոնն ապօրինի է տեղադրվել։ Դիմեցինք Երևանից քաղաքապետարան՝ հասկանալու համար՝ արդյո՞ք արդեն կազմվել է արձանագրությունը, սակայն հայտնեցին, որ այս պահին որևէ նորություն չունեն։

Մանրամասները՝ տեսանյութում։

Անժելա Պողոսյան