10.10.2026 | 11:12
Վարորդական վկայական ստանալու «պարզեցված» առաջարկները խարդախություն են․ ՆԳՆ-ն զգուշացնում է
Ղազախստանում Ալիևը կրկին հիշել է «միջանցքի» մասին և մեղադրանքներ հնչեցրել Հայաստանի հասցեին
Քաղաքականություն
13.10.2022 | 13:13
Ադրբեջանի նախագահ Իլհամ Ալիևը Ղազախստանում անցկացվող Ասիայում փոխգործակցության և վստահության միջոցների ամրապնդման 6-րդ գագաթնաժողովի ընթացքում հանդես է եկել մի շարք կեղծ հայտարարություններով։ Մասնավորապես, նա Հայաստանին է մեղադրել Բաքվի վերջին ագրեսիայի համար։
«Հայաստանը շարունակում է սահմանին ռազմական սադրանքները։ Դրանցից վերջինն այս տարվա սեպտեմբերին էր։ Ադրբեջանի ԶՈՒ-ն ստիպված էր որոշիչ հակագործողություններ իրականացնել հայկական ռազմական սադրանքը կանխելու համար։ Այդ սադրանքների պատասխանատվությունը կրում է Հայաստանի ռազմաքաղաքական ղեկավարությունը»,- ադրբեջանական լրատվամիջոցների փոխանցմամբ՝ այս մասին հայտարարել է Ալիևը՝ մոռանալով, սակայն, նշել, թե ինչ գործ ունեն ադրբեջանական զորքերը ՀՀ սուվերեն տարածքում, որոնք ռմբակոծել են Հայաստանի խաղաղ բնակավայրերն ու քաղաքացիական ենթակառուցվածքները, մահապատժի են ենթարկել հայ զինծառայողներիմ և այլ ռազմական հանցագործություններ են կատարել։
Ի դեպ, հոկտեմբերի 6-ին Պրահայում տեղի ունեցած հանդիպումներից հետո Ադրբեջանի նախագահը կրկին խոսել է գոյություն չունեցող «Զանգեզուրի միջանցքի» մասին։
«Ադրբեջանը կարևոր ներդրում ունի Արևելք-Արևմուտք և Հյուսիս-Հարավ տրանսպորտային միջանցքների զարգացման գործում։ Մեր երկիրն ակտիվորեն առաջ է տանում «Զանգեզուրի միջանցքի» ստեղծումը, որը դառնալու է Միջին միջանցքի կարևոր մասը»,- ասել է Ալիևը։
Հավելենք, որ Ղազախստանում անցկացվող գագաթնաժողովին մասնակցում են նաև ՌԴ նախագահ Վլադիմիր Պուտինն ու Թուրքիայի նախագահ Ռեջեփ Թայիփ Էրդողանը։
Էմմա Չոբանյան
