Ինչ պետք է իմանալ աշխատանքի ընդունվելիս․ աշխատավարձից մինչև արձակուրդ և աշխատանքային պայմանագիր․ ՏԵՍԱՆՅՈՒԹ

Ի՞նչ պետք է իմանալ աշխատանքի ընդունվելիս․ 

1․ Ձեր և գործատուի միջև աշխատանքային հարաբերություններն ամրագրվում են աշխատանքային պայմանագրով կամ անհատական հրամանով։ Աշխատանքային պայմանագիրը համաձայնություն է աշխատողի և գործատուի միջև։ Այն կնքվում է երկու հավասարազոր օրինակներից։

2․ Աշխատանքի անցնելուց առաջ գործատուն կամ նրա լիազորած անձը պարտավոր է աշխատանքի ընդունվող անձին պատշաճ ծանոթացնել աշխատանքի պայմաններին, կոլեկտիվ պայմանագրին (դրա առկայության դեպքում), ներքին կարգապահական կանոններին, աշխատավայրում նրա աշխատանքը կանոնակարգող գործատուի այլ իրավական ակտերին:

3․ Աշխատանքային պայմանագրի կնքման ժամանակ կողմերի համաձայնությամբ կարող է սահմանվել փորձաշրջան: Փորձաշրջանի ժամկետը չի կարող երեք ամսից ավելի լինել (բացառությամբ՝ օրենքով սահմանված դեպքերի): Փորձաշրջանի ընթացքում աշխատողն ունի վարձատրության իրավունք առանց որևէ սահմանափակման:

4․ Պայմանագրում կամ հրամանում պետք է նշվի նաև աշխատանքը սկսելու օրը, աշխատավարձի չափը կամ այն որոշելու ձևը, հավելումների և հավելավճարների չափը, աշխատաժամանակի ռեժիմը, ամենամյա արձակուրդի տեսակը։

Եթե գործատուն խախտել է Ձեր աշխատանքային իրավունքները, ապա կարող եք տեղեկացնել մեզ և ստանալ աջակցություն։

Եթե խախտվել են ձեր աշխատանքային իրավունքները, «Արժանապատիվ աշխատանք հիմա» ծրագրի շրջանակում անվճար իրավական աջակցություն ստանալու համար կարող եք զանգահարել 041 12 33 02 հեռախոսահամարով։