18.08.2026 | 19:29
Երևանում, Արարատյան դաշտում ու 3 մարզում սպասվում է բարձր կարգի հրդեհավտանգ իրավիճակ
Ադրբեջանի Մեջլիսի պատգամավորը հայտարարել է, թե Ալիևի «դիմադրության» պատճառով Եվրոպայի երկրներում Բաքվի դեմ բանաձևեր են ընդունվելու
Քաղաքականություն
11.10.2022 | 16:17
Ադրբեջանի Միլի Մեջլիսի պատգամավոր, Մարդու իրավունքների հանձնաժողովի նախագահ Զահիդ Օրուջը հայտարարել է, որ առաջիկայում Եվրոպայի տարբեր երկրների խորհրդարաններում ընդունվելու են հակաադրբեջանական բանաձևեր, գրում են տեղական լրատվամիջոցները։
Նա, մասնավորապես, նշել է, որ մեկ տարուց ավելին է՝ Ֆրանսիան փորձում է արտասահմանցի դիտորդների ներգրավել և համակողմանի ճնշում է գործադրում Ադրբեջանի վրա։
«Պրահայի վերջին հանդիպման ընթացքում որոշում է ընդունվել քաղաքացիական առաքելություն ուղարկել Հայաստան, ոչ թե մեր տարածք։ Դա խոսում է այն մասին, որ նախագահ Իլհամ Ալիևը վճռականորեն պաշտպանում է միջազգային հարթակում մեր ռազմական հաղթանակը։ Ինչո՞ւ են եվրոպացի դիտորդները գալիս տարածաշրջան, քանի որ Ղարաբաղյան պատերազմի հանկարծակի մեկնարկը հարվածել է Արևմուտքի, հատկապես՝ Ֆրանսիայի տնտեսական ու քաղաքական ազդեցությանը տարածաշրջանում։ Եվ այն ուժերը, որոնք նոյեմբերի 10-ին չկարողացան Ղարաբաղ բանակ ուղարկել, հիմա այլ պատրվակով ցանկանում են հաստատվել սահմանին»,- ասել է ադրբեջանցի պատգամավորը՝ ևս մեկ անգամ փաստելով, որ Բաքուն որևէ կերպ շահագրգռված չէ սահմանին կայունության հաստատմամբ և սադրանքների իրականացման հեղինակն է։
Օրուջը նաև հայտարարել է, որ առաջիկայում Ադրբեջանի դեմ բանաձևեր են ընդունվելու եվրոպական երկրներում, իբր, «Ալիևի դիմադրության պատճառով»։
«Առաջիկայում Ֆրանսիայի ու այլ երկրների խորհրդարաններում հնարավոր է բանաձևերի ու որոշումների ընդունում Ադրբեջանի դեմ, որի պատճառը մեր երկրի վճռական դիմադրությունն է տարածաշրջանում արևմտյան ռազմական զորակազմի տեղակայման հետ»,- ասել է ադրբեջանցի պատգամավորը՝ մոռանալով նշել, որ ՀՀ-ն իր սեփական տարածք կարող է հրավիրել միջազգային տարբեր կառույցների, խմբերի, դիտորդների, որի համար բնավ էլ պետք չէ Բաքվի համաձայնությունը։
Էմմա Չոբանյան
