08.06.2026 | 10:04
Ամփոփվել են 2005 ընտրատեղամասերից ստացված նախնական արդյունքները. ԿԸՀ
Էնթոնի Բլինքենը կարևորել է Լեռնային Ղարաբաղի բնակիչների իրավունքների և երաշխիքների շուրջ քննարկումները
Քաղաքականություն
11.10.2022 | 10:32
Արդեն հայտնել էինք, որ ԱՄՆ պետքարտուղար Էնթոնի Բլինքենը երեկ հեռախոսազրույց է ունեցել Հայաստանի Հանրապաետության վարչապետ Նիկոլ Փաշինյանի հետ։ ԱՄՆ Պետդեպարտամենտի տարածած հայտարարության մեջ նշվում է, որ Բլինքենը կարևորել է Լեռնային Ղարաբաղի բնակիչների իրավունքների և երաշխիքների շուրջ քննարկումները։
Տեղեկացվում է, որ պետքարտուղար Բլինքենն իր երախտագիտություն է հայտնել Հայաստանի և Ադրբեջանի կողմից իրականացվող դրական քայլերի համար՝ կայուն խաղաղության համաձայնագրի ձեռքբերման ուղղությամբ, ներառյալ արտաքին գործերի նախարարների և ղեկավարների միջև ուղիղ բանակցությունները։
«Պետքարտուղար Բլինքենը վերահաստատել է ԱՄՆ աջակցությունը՝ սահմանների հստակ սահմանազատման, տրանսպորտային հաղորդուղիների ապաշրջափակման, անհետ կորածների ճակատագրի բացահայտման ու նույնականացման, կալանավորների վերադարձի հետ կապված հարցերում: Պետքարտուղար Բլինքենը նաև ողջունել է Ադրբեջանի հետ սահմանին ԵՄ քաղաքացիական առաքելության տեղակայումը՝ վստահություն ստեղծելու նպատակով: Նա ընդգծել է Լեռնային Ղարաբաղի բնակիչների իրավունքների և երաշխիքների շուրջ քննարկումների կարևորությունը և երկու կողմերի միջև հրադադարի ռեժիմը պահպանելու ու բանակցային համաձայնագրի վրա կենտրոնանալու անհրաժեշտությունը՝ որպես կայուն խաղաղության միակ ճանապարհ»,- ասված է ԱՄՆ պետքարտուղարության տարածած հայտարարության մեջ:
Տաթև Ֆռանգյան
