Ես ստացել եմ տեսանյութեր սարսափելի հանցագործությունների մասին․ ԵԽԽՎ պատգավորը՝ Ադրբեջանի վայրագությունների մասին

ԵԽԽՎ-ում Հայաստանի դեմ Ադրբեջանի ագրեսիայի քննարկման ժամանակ EPP խմբակցության խոսնակ, Շվեդիայից պատգամավոր Բորիանա Աբերգը խոսել է Բաքվի ռազմական հանցագործություններից։

Նա նշել է, որ մի քանի օր առաջ ստացել է տեսանյութեր, որոնք ցույց են տալիս հայ կանանց ու ռազմագերիների սարսափելի մահապատիժները ու դիերի նկատմամբ անարգանքը։

«Հայաստանի տարածքի վրա Ադրբեջանի լայնածավալ ներխուժումից ադրբեջանցի օգտատերերի կողմից սոցցանցերում բազմաթիվ տեսանյութեր են հայտնվել։ Դրանք ցուցադրում են ռազմական հանցագործությունների սարսափելի տեսարանները հայ ռազմագերիների նկատմամբ, հայ զինծառայողների, այդ թվում՝ կանանց խոշտանգումները»,- նշել է պատգամավորը։

Ըստ նրա՝ միջազգային հանրությունը դատապարտել է դրանք ու հետաքննության կոչ արել։

«Մեր դիրքորոշումը հստակ է՝ նրանք, որոնք պատասխանատու են ռազմական հանցագործությունների համար, պետք է պատասխանատվության ենթարկվեն։ Մենք ունենք մի իրավիճակ, երբ այս կազմակերպության մի անդամը հարձակվել է մեկ այլ անդամի վրա։ Սեպտեմբերի 13-ին մենք ականատեսը եղանք Հայաստանի դեմ ագրեսիայի, որին հետևել է Հայաստանի սուվերեն տարածքի օկուպացիան, մարդկային կյանքերի կորուստը, Հայաստանի քաղաքացիական ենթակառուցվածքների լայնածավալ ոչնչացումը»,- հայտարարել է շվեդ պատգամավորը։

Բորիանա Աբերգը նշել է, որ EPP-ն կոչ է անում Ադրբեջանին՝ իր ուժերը դուրս բերել Հայաստանի սուվերեն տարածքից, և հայտարարում, որ ուժի կիրառումն անընդունելի է։

Էմմա Չոբանյան