03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
Ղրիմում մոտ 50 000 զբոսաշրջիկ կա․ նրանց խոստանում են դուրս բերել լաստանավերով
Քաղաքականություն
08.10.2022 | 17:28
Ղրիմում մոտ 50 հազար զբոսաշրջիկ կա, հայտնել է Ռուսաստանի տուրօպերատորների ասոցիացիան: Թերակղզու և Կրասնոդարի երկրամասի միջև հիմնական տրանսպորտային հաղորդակցությունը ընթանում էր Ղրիմի կամրջով, որն անորոշ ժամանակով շարքից դուրս է եկել պայթյունից հետո:
Ինչպես փոխանցում է BBC-ի ռուսական ծառայությունը՝ Ռոստուրիզմի ղեկավար Զարինա Դոգուզովան հայտարարել է, որ նրանց համար, ովքեր արդեն ավտոմոբիլային տրանսպորտով մեկնել են Ղրիմ կամ հակառակը, կամրջի մուտքերի մոտ կտեղակայվեն սննդի և ջեռուցման կետեր: Ղրիմում գտնվող զբոսաշրջիկների համար բացվել է թեժ գիծ, հավելել է նա:
Բռնակցված Ղրիմի ղեկավար Սերգեյ Աքսյոնովն իր հերթին խնդրել է զբոսաշրջիկներին, որոնք պատրաստվում էին հոկտեմբերի 8-ին լքել թերակղզին, հյուրանոցներում և առողջարաններում մնալ ևս մեկ օր: Ծախսերը, Աքսյոնովի խոսքով, կփոխհատուցվեն։
Ռուսաստանի իշխանությունները ծրագրում են լաստանավեր գործարկել ավտոմոբիլային և երկաթուղային հաղորդակցության փոխարեն, սակայն դրա կազմակերպման համար ժամանակ կպահանջվի:
Հիշեցնենք՝ Կերչի նեղուցով անցնող Ղրիմի կամրջի վրա պայթյուն է տեղի ունեցել, փլուզվել է ավտոմոբիլային կամրջի մի մասը։
Պայթյունից հետո բեռնատար գնացքի՝ վառելիքով լցված մի քանի բաք է հրդեհվել։ Ավելի ուշ ՌԴ Ազգային հակաահաբեկչական կոմիտեն հայտարարել է, որ Ղրիմի կամրջով անցնող բեռնատար ավտոմեքենա է պայթեցվել, ինչը հանգեցրել է բեռնատար գնացքի վառելիքով բեռնված 7 բաքերի բռնկմանը։ Ղրիմի կամուրջը ռազմավարական նշանակություն ունի, քանի որ դրանով են իրականացվում ռազմաճակատում եղած ռուսական ուժերի հիմնական մատակարարումները։
Ղրիմի կամրջի վրա տեղի ունեցած պայթյունի հետևանքով 3 մարդ է մահացել, հայտնել են Ռուսաստանի Քննչական կոմիտեից:
