Զինվորների խոշտանգման տեսանյութերը պատահական չեն տարածվել․ Գայանե Աբրահամյան․ ՏԵՍԱՆՅՈՒԹ

«Այսօր մեր հասարակությունը բացարձակ մեդիագրագետ չէ, կամ հասարակության խիստ մեծ մասը մեդիագրագետ չէ. ամբողջովին տրվում ու դառնում է զոհը այն կեղծ նարատիվների, որոնք տարածվում են»,- այսօր հրավիրված «Հիբրիդային պատերազմ. Տեղեկատվական դիվերսիաների թիրախներն ու դրա դեմ պայքարի քայլերը» թեմայով հանրային բաց քննարկման ժամանակ այսպիսի կարծիք հայտնեց «Հանուն հավասար իրավունքների» կրթական կենտրոն ՀԿ նախագահ, ԱԺ նախկին պատգամավոր Գայանե Աբրահամյանը:

Նրա կարծիքով՝ ՀՀ-ի համար հիբրիդային պատերազմի տեսանկյունից շատ ավելի դժվար է, քանի որ և՛ արտաքին, և՛ ներքին, և՛ տարբեր երկրներից եկող կեղծ լուրերի, կեղծ նարատիվների մեխանիզմն է կիրառվում:

Անդրադառնալով Ադրբեջանի կողմից կին զինծառայողների դիակները խոշտանգելու, հայ զինծառաողներին գնդակահարելու տեսանյութերի տարածմանը՝ Գայանե Աբրահամյանն ասաց. «Սրանք բոլորովին պատահական չէ, որ տարածվում են: Պետք է հասկանանք՝ ո՞րն է Ադրբեջանի կողմից հիմնական պատճառը: Իհարկե, Ադրբեջանը հասկանում է՝ սա երկարաժամկետ կտրվածքում իրավական դիվանագիտության տեսանկյունից իրենց վնաս է: Սա լինելու է մեր կարևոր հիմքերից մեկը ՄԱԿ-ի դատարանում, ՄԻԵԴ-ում: Իրավական տեսանկյունից այստեղ շահած ենք դուրս գալու, բայց ես հասկանում եմ, որ Ադրբեջանը լուծում էր կարճաժամկետ խնդիր: Այս տեսանյութերը տարածելով՝ հուսահատություն, սարսափ է տարածում մեր բնակչության շրջանում: Եվ մենք դրա մաս ենք կազմում. մենք ինքներս տարածում ենք»:

Մանրամասները՝ տեսանյութում։