13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Բաքվին փոխանցված ադրբեջանցի դիվերսանտ Շահբազ Գուլիևը փորձել է ինքնահրկիզվել Ալիևի աշխատակազմի շենքի մոտ. ԼՈՒՍԱՆԿԱՐՆԵՐ
Քաղաքականություն
07.10.2022 | 16:33
Ադրբեջանցի դիվերսանտ Շահբազ Գուլիևը Բաքվում այսօր հերթական բողոքի ակցիան է անցկացրել՝ պահանջելով իշխանություններից լուծել իր սոցիալական խնդիրները։ Տեղական լրատվականների հաղորդմամբ՝ Գուլիևը նախագահ Իլհամ Ալիևի աշխատակազմի շենքի մոտ միայնակ բողոքի ակցիայի է դուրս եկել և պահանջել իրեն հաշմանդամության կարգ ու թոշակ նշանակել։
Գուլիևը նաև ինքնահրկիզման փորձ է արել, սակայն ոստիկաններին հաջողվել է կանխել այն ու նրան հեռացնել տարածքից։
Հիշեցնենք, որ 2014 թվականի հունիսի 29-ին զինված վիճակում ադրբեջանցիներ Դիլհամ Ասկերովը և Շահբազ Գուլիևն ապօրինաբար հատել էին Արցախի Հանրապետության պետական սահմանը, այնուհետև առևանգել և սպանել 17-ամյա քարվաճառցի Սմբատ Ցականյանին։ Ասկերովին ու Գուլիևին ուղեկցել էր երրորդ անձ՝ Հասան Հասանովը, որը Վարդենիս-Մարտակերտ ավտոճանապարհի վրա սպանել էր ՀՀ բանակի մայոր Սարգիս Աբրահամյանին և լրջորեն վիրավորել նրա ուղեկից Կարինե Դավթյանին։ Ասկերովն ու Գուլիևը ձերբակալվել էին Արցախի ոստիկանության և զինված ուժերի համատեղ գործողությունների արդյունքում, իսկ Հասանովը սպանվել էր Պաշտպանության բանակի դիրքապահների հետ փոխհրաձգության հետևանքով։
Արցախի դատարանն Ասկերովին դատապարտել էր ցմահ ազատազրկման, իսկ Գուլիևին՝ 22 տարվա ազատազրկման։
2020 թվականի նոյեմբերի 9-ի եռակողմ հայտարարության պայմանների համաձայն՝ 2020-ի դեկտեմբերի 14-ին հայկական կողմը Բաքվին է արտահանձնել Ասկերովին և Գուլիևին գերիների փոխանակման շրջանակում։
Բաքու վերադառնալուց հետո տեղական Xural TV-ի ուղիղ եթերում Գուլիևը հայտարարել էր, որ իրեն և իր գործընկեր Դիլհամ Ասկերովին Քարվաճառ են ուղարկել՝ այն ժամանակ Ադրբեջանի փոխվարչապետ Ալի Հասանովի հրամանով։
Հավելենք, որ Գուլիևն ու Ասկերովը պարբերաբար բողոքում են Ադրբեջանի իշխանությունների անտարբերությունից ու պահանջում լուծել իրենց սոցիալական խնդիրները։
Էմմա Չոբանյան
