20.11.2024 | 18:30
Կարինե Քոչարը՝ Ռուբեն Քոչարի մեղադրանքների մասին
Իսրայելի ՊՆ ղեկավարն Ադրբեջանի այցի ընթացքում ռազմական և անվտանգության ոլորտներում համաձայնագրեր է ստորագրել
Քաղաքականություն
06.10.2022 | 22:32
Իսրայելի պաշտպանության նախարար Բենի Գանցը հայտնել է, որ ավարտել է իր չհայտարարված այցն Ադրբեջան, որի ընթացքում հանդիպել է ադրբեջանցի բարձրաստիճան պաշտոնյաների հետ և ստորագրել համագործակցության մի շարք համաձայնագրեր ռազմական ու անվտանգության ոլորտներում, գրում է Asharq Al-Awsat-ը։
Գանցի մամուլի խոսնակը նշել է, որ այցը տեղի է ունեցել երկուշաբթի, նախարարին բարձրաստիճան պատվիրակություն է ուղեկցել։ Ըստ պաշտպանական գերատեսչության աղբյուրի, որը պատվիրակության կազմում է եղել, Գանցին հարցրել են պաղեստինյան իրավիճակի մասին, և նա մերժել է Արևմտյան ափ ներխուժելու բոլոր առաջարկները՝ ի պատասխան պաղեստինյան գործողությունների:
Նշվում է, որ Գանցն ընդգծել է Իսրայելի և Ադրբեջանի միջև ռազմավարական հարաբերությունների պահպանման և Աբրահամի համաձայնագրի ստորագրումից հետո Մերձավոր Արևելքի տարածաշրջանում տեղի ունեցած փոփոխությունների կարևորությունը։ Աղբյուրը նաև ասել է, որ բարձրաստիճան պաշտոնյաները քննարկել են Իսրայելի կապերի զարգացումը Թուրքիայի ու տարածաշրջանի և աշխարհի այլ երկրների հետ։
Օգտվելով Իրանին հարևան երկրում գտնվելու հանգամանքից՝ Գանցը Israel Hayom-ի ռազմական թղթակից Յոավ Լիմորին ասել է, որ Թել Ավիվը կարող է պատասխանել Իրանում ցանկացած զարգացման։ Նա հավելել է, որ միջուկային գործարքը առաջ չի շարժվում, սակայն դեռ չի էլ դադարեցվել՝ նշելով, որ Իսրայելը համաձայնագրին դեմ է։
Գանցին ուղեկցող բարձրաստիճան աղբյուրն ասել է, որ Իսրայելը լավ հարաբերություններ ունի Ադրբեջանի հետ, ինչն էական է, քանի որ այն Իրանին հարևան կարևոր երկիր է, և Իսրայելը բախվում է Թեհրանի ռեժիմի առաջնորդների բազմաթիվ թշնամական սխեմաների։ Աղբյուրը նշել է, որ Իսրայելն ու Ադրբեջանը պետք է համակարգեն իրենց գործողություններն այս սխեմաներին միասին դիմակայելու համար՝ նշելով, որ հանդիպումների արդյունքում պարզվել է, որ երկու կողմերն ունեն նույն տեսլականը տարածաշրջանային բազմաթիվ խնդիրների վերաբերյալ։
Այցի ընթացքում Գանցը նաև հանդիպել է Ադրբեջանի սահմանապահ ծառայության պետ Էլչին Գուլիևին ու այցելել Պետական սահմանային ծառայության շտաբ։
Հիշեցնենք, որ այս տարի ապրիլին էլ Իսրայելի ֆինանսների նախարար Ավիգդոր Լիբերմանն էր այցելել Ադրբեջան, որին ընդունել էր նախագահ Իլհամ Ալիևը։
Էմմա Չոբանյան
