21.04.2026 | 19:15
Պուտինը գիտի՝ ռուսամետ ուժերը ՀՀ-ում իշխանության չեն գա, ուզում է՝ ԱԺ մտնեն, ՌԴ-ի շահերը պաշտպանեն․ Միքայել Զոլյան. ՏԵՍԱՆՅՈՒԹ
Հյուսիսային Կորեայի կողմից հրթիռի արձակումից հետո ամերիկյան ավիակիրը շարժվել է դեպի Ճապոնական ծով
Քաղաքականություն
05.10.2022 | 16:00
Միջուկային էներգիայով աշխատող ԱՄՆ ռազմածովային ուժերի Ronald Reagan ավիակիրը շարժվել է դեպի Ճապոնական ծով այն բանից հետո, երբ Հյուսիսային Կորեան միջին հեռահարության հրթիռ է արձակել Ճապոնիայի վրայով։ Ռազմանավը կտեղակայվի Հարավային Կորեայից արևելք, հայտնում է VOA-ն՝ հղում անելով հարավկորեացի զինվորականներին։
Ավիակրի վերադարձը Ճապոնական ծով պատասխան կլինի Հյուսիսային Կորեայի կողմից բալիստիկ հրթիռի արձակմանը։ Նախկինում Ronald Reagan-ը մասնակցել է ԱՄՆ-ի, Ճապոնիայի և Հարավային Կորեայի համատեղ ռազմածովային զորավարժություններին։ Սեպտեմբերի վերջին՝ ավիակիրի զորավարժությունների վայր ժամանելուց մի քանի օր անց, Հյուսիսային Կորեան բալիստիկ հրթիռ է արձակել դեպի Ճապոնական ծով։
Երկուշաբթի լույս երեքշաբթի գիշերը Հյուսիսային Կորեան միջին հեռահարության հրթիռ է արձակել, որն անցել է Ճապոնիայի տարածքի վրայով և ընկել օվկիանոսը։ Ճապոնիայի կառավարությունը նախազգուշացում է տարածել՝ խորհուրդ տալով հյուսիսային շրջանների բնակիչներին պատսպարվել ռմբապաստարաններում կամ ամուր շենքերում: Նախազգուշացում է տրվել նաև ամբողջ երկրի օդային տրանսպորտի համար։
Տարեսկզբից Հյուսիսային Կորեան արձակել է 23 հրթիռ, վերջին անգամ այն արձակվել է երեք օր առաջ։
Տաթև Ֆռանգյան
