Ադրբեջանի կողմից ՀՀ տարածքների օկուպացումն անընդունելի է․ Ժոզեպ Բորել․ ՏԵՍԱՆՅՈՒԹ

Ադրբեջանի կողմից ՀՀ տարածքների օկուպացումն անընդունելի է ու անհարգալից վերաբերմունք է միջազգայնորեն ճանաչված սահմանների նկատմամբ։ Այս մասին հայտարարել է ԵՄ արտաքին գործերի գերագույն ներկայացուցիչ Ժոզեպ Բորելը Եվրախորհրդարանում Հայաստանի և Ադրբեջանի միջև լարվածության բարձրացման հարցի շուրջ քննարկումների ժամանակ:

«Ադրբեջանը ռմբակոծել և գրավել է հայկական տարածքների մի մասը, այն տարածքները, որոնք նաև գտնվում են Հայաստանի տարածքում, նրանք օգտագործել են հրետանի, ինչպես նաև անօդաչու թռչող սարքեր», – ասել է Բորելը՝ նշելով, որ սա չափազանց ցավալի է։

«Այն, ինչ կատարվում է, չափազանց ցավալի է, կա մոտ 300 զոհ, 207-ը՝ հայ։ Կան որոշ օկուպացված տարածքներ, ինչը բացարձակապես անընդունելի է և անհարգալից վերաբերմունք է միջազգայնորեն ճանաչված սահմանների նկատմամբ։ Ուժերն այնքան մոտ են, որ նոր բախման վտանգ կա»,- հայտարարել է ԵՄ Գերագույն ներկայացուցիչը՝ հավելելով, որ ադրբեջանական ուժերը պետք է դուրս բերվեն։

«Ադրբեջանը իսկապես մեզ տալիս է, ավելի ճիշտ՝ վաճառում է վառելիք՝ միլիարդավոր խորանարդ մետր գազ, և շնորհիվ այս տարի կնքված համաձայնագրի մենք կունենանք ծավալների էական ավելացում՝ 8-12 միլիարդ խորանարդ մետր։ Կարող եմ վստահեցնել՝ դրա դիմաց քաղաքական զիջումներ չեն արվել, Եվրահանձնաժողովի նախագահն անձամբ է մեկնել Ադրբեջան՝ այս գործարքը բանակցելու համար։ Դա հնարավորություն կտա ստանալ էներգակիրներ, որոնց կարիքը եվրոպացիներն այնքան ունեն այս ձմեռ»,- ասել է Բորելը:

Տաթև Ֆռանգյան