Ուկրաինայի ԶՈՒ-ն Խարկովի և Խերսոնի շրջաններում առաջխաղացում ունի

Պատերազմի ուսումնասիրման ամերիկյան ինստիտուտը (ISW) իր ամենօրյա ամփոփագրում հաստատում է, որ ուկրաինական բանակն ընդլայնում է վերահսկողության գոտին հյուսիս-արևելքում՝ Կրեմեննայա և Սվատով ուղղություններով և Խերսոնի շրջանում։ Միաժամանակ, ամերիկացի վերլուծաբաններն ընդգծում են, որ այս շրջաններում ուկրաինացիների դեմ կռվում են այն ստորաբաժանումները, որոնք նախկինում համարվում էին ռուսական բանակի լավագույններից։

«Խերսոնի մարզում և Լիմանի ճակատում ռուսական խմբավորումները մեծ մասամբ կազմված էին ստորաբաժանումներից, որոնք մինչ պատերազմը համարվում էին Ռուսաստանի լավագույն մարտական ստորաբաժանումներից»,- գրում են ամերիկացի վերլուծաբանները և բացատրում, որ Լիմանի դեպքում խոսքը 144-րդ գվարդիայի մասին է, իսկ Խերսոնի շրջանում՝ 76-րդ գվարդիական օդադեսանտային դիվիզիայի մասին։

ISW-ն, հենվելով ՌԴ Գլխավոր շտաբի, ռուս ռազմական բլոգերների, ուկրաինական աղբյուրների, գեոլոկացիոն լուսանկարների և տեսանյութերի և այլ տեղեկությունների վրա, գրում է, որ ուկրաինացիներն ընդլայնում են իրենց վերահսկողության գոտիները Կուպյանսկից, Բորովայայից, Լիմանից դեպի արևելք՝ մոտենալով Կրեմեննայա և Սվատովո քաղաքներին և դրանք իրար միացնող ճանապարհին։ ISW-ի վերլուծաբանները հաստատում են նաեւ Խերսոնի շրջանի հյուսիսում ուկրաինացիների առաջխաղացման մասին տեղեկությունը։

«Խերսոնի մարզում ուկրաինացիների հաջողությունները հարվածում են ռուսական, առանց այն էլ անկայուն, տեղեկատվական տարածքին: Ռուսական օկուպացիոն վարչակազմի պաշտոնյաները ՆԱՏՕ-ի հետախուզությանը մեղադրում են Խերսոնի շրջանում ռուսական պաշտպանության թույլ կողմերը բացահայտելու մեջ և կոչ են անում ռուսական ուժերին պատրաստվել փողոցային մարտերի և կառուցել նոր պաշտպանական գծեր»,- գրում է ISW-ը՝ հղում անելով ԴԺՀ-ի պաշտոնյա Դանիիլ Բեզսոնովի թելեգրամյան ալիքին։

Տաթև Ֆռանգյան