Ինչո՞ւ է Շիրակի նախկին մարզպետը բուհի ղեկավարի պաշտոնից ազատման դիմում ներկայացրել

Շիրակի նախկին մարզպետ Տիգրան Պետրոսյանը, որը մեկ տարի է՝ զբաղեցնում է Հայաստանի պոլիտեխնիկական համալսարանի Գյումրու մասնաճյուղի   տնօրենի պաշտոնը, աշխատանքից ազատման դիմում է ներկայացրել։ Մեր այս տեղեկությունը հաստատեցին հենց բուհից։ Թե որն է պաշտոնից հրաժարվելու պատճառը, երբ մեկ տարի առաջ Տիգրան Պետրոսյանը մեծ ոգևորությամբ էր ընդունել, իր բառերով ասած, «հարազատ բուհի» ղեկավար դառնալու հրավերը, չհաջողվեց ճշտել նրանից․ մեր հեռախոսազանգերը մնացին անպատասխան։

Գյումրիում, սակայն, տեղեկություններ են շրջանառվում, որ Տիգրան Պետրոսյանի հեռանալը կապված է Անի խոշորացված համայնքում տեղի ունեցած ՏԻՄ ընտրությունների հետ։

Շիրակի նախկին մարզպետն այս ընտրություններում սատարում էր ամենաքիչ ձայներ հավաքած քաղաքական ուժին՝ նորաստեղծ «Հայկական երազանք» կուսակցությանը, որի որոշումից էլ այս պահին կախված է տեղական իշխանության ձևավորումն Անիում։

Անիում թե՛ «Ազգ-համայնք» դաշինքը, որը գլխավորում է գործող ՀՀԿ-ական համայնքապետ Արտակ Գևորգյանը, և թե՛ «Քաղաքացիական պայմանագիր» կուսակցությունը չեն կարողանա միանձնյա իշխանություն ձևավորել, հետևաբար և 3 մանդատ ստացած «Հայկական երազանք» կուսակցությունը կամ կոալիցիա պիտի կազմի 8 մանդատ ստացած ՔՊ-ի հետ կամ 10 մանդատ ստացած «Ազգ-համայնք» դաշինքի հետ։ Համաձայնության չգալու դեպքում ընտրությունները չեղարկվելու են և վեց ամիս անց նոր ընտրություններ են հայտարարվելու։

«Հայկական երազանք» կուսակցության թեկնածու Ագուն Սաղաթելյանը իր ֆեյսբուքյան էջում հայտարարել է, որ կոալիցիա կազմելու նախաձեռնությամբ հանդես չեն գալու, եթե այս ուժերից որևէ մեկը դիմի իրենց, ապա կքննարկեն այդ հարցը։ Այսինքն՝ տվյալ դեպքում որ ուժի հետ էլ կոալիցիա կազմի, համայնքապետի թեկնածու պիտի առաջադրեն Ագուն Սաղաթելյանին։

3 մանդատ ստացած ուժի այս պնդումն էլ, ըստ շրջանառվող տեղեկության, դարձել է Տիգրան Պետրոսյանի պաշտոնազրկման պատճառ, քանի որ անհնար է դառնում ՔՊ-ի՝ Անիում տեղական իշխանության ղեկի ստանձնումը։ Մենք, բնականաբար, կհրապարկենք Տիգրան Պետրոսյանի պարզաբանումներն այս թեմայի շուրջ՝ այն լսելուն պես։

Արմիկ Մովսիսյան