02.11.2026 | 22:55
«Ադրբեջանում խոսքի ազատությունն ու անկախ քաղաքական գործունեությունը ճնշվում են». ԵԽԽՎ և ԵԱՀԿ ԽՎ ներկայացուցիչներ
Չնայած երկրում աննախադեպ գնաճին ու ճգնաժամին՝ Էրդողանը հայտարարել է, թե Թուրքիան շարժվում է տնտեսական ճիշտ ուղղությամբ
Քաղաքականություն
30.09.2022 | 23:25
Թուրքիան քայլ առ քայլ ոչնչացնում է իր հակառակորդների ծրագրերը՝ շարունակելով շարժվել դեպի իր նպատակները։ Հակաթուրքական շրջանակների գործողությունների վերջին օղակը թուրքական տնտեսության վրա ճնշումն էր։ Այս մասին հայտարարել է Թուրքիայի նախագահ Ռեջեփ Թայիփ Էրդողանը «Տնտեսական վերափոխումներ և նոր պարադիգմներ» թեմայով հանդիպմանը, որը տեղի է ունեցել Ստամբուլում Դոլմաբահչե պալատում, գրում է Անադոլու գործակալությունը։
Նա նշել է, որ, իբր, թուրքական տնտեսությունը գնաճի և բարձր տոկոսադրույքների ճիրաններում սեղմելու, ինչպես նաև ազգային արժույթին վնասելու փորձերը խափանվել են թուրքական կառավարության ջանքերով։ Ըստ Էրդողանի՝ համաշխարհային տնտեսական ճգնաժամը, որը սկսվել է համավարակից ի վեր և շարունակվել պատերազմի ազդեցության տակ, իբր, հաստատել է Թուրքիայի տնտեսության կայունությունը և Անկարայի կուրսի ճշգրտությունը։
Թուրքիայի նախագահի խոսքով՝ Անկարան փորձում է տարածաշրջանային ու միջազգային գործընթացներից առավելագույն հնարավորություններն օգտագործել ի շահ Թուրքիայի։
«Ճնշումները և անարդարությունը ստիպեցին Թուրքիային մշակել տնտեսական զարգացման նոր մոդել՝ համաշխարհային տնտեսական համակարգի ընդունված կանոնների շրջանակներում։ Վերջին տարիների գործընթացները ցույց են տալիս, որ մենք ճիշտ ուղու վրա ենք»,- հայտարարել է Թուրքիայի ղեկավարը։
Հավելենք, որ տարբեր փորձագետների կարծիքով՝ Էրդողանի ձախողել է երկրի տնտեսության կառավարումը, որի հետևանքով այսօր Թուրքիայում տնտեսական լրջագույն ճգնաժամ է։ Երկրում գնաճը, պաշտոնական տվյալներով, հասել է վերջին 24 տարվա առավելագույնին՝ շուրջ 80 տոկոսի։
Էմմա Չոբանյան
