09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Զապորոժիեում մարդասիրական ավտոշարասյան գնդակոծությունը տասնյակ մարդկանց կյանք է խլել
Քաղաքականություն
30.09.2022 | 14:16
Սեպտեմբերի 30-ի առավոտյան Զապորոժիեից ելքի ժամանակ գնդակոծության տակ է հայտնվել քաղաքացիական մարդասիրական շարասյունը։ Ուկրաինայի իշխանությունների տվյալներով՝ գրոհի հետևանքով զոհվել է 23 մարդ, 28-ը՝ վիրավորվել, փոխանցում է VOA-ն։
Ուկրաինան գրոհների մեջ մեղադրել է Ռուսաստանին։
«Մարդիկ կանգնել էին՝ մուտք գործելու ժամանակավորապես օկուպացված տարածքներ, որպեսզի իրենց հետ տանեին իրենց հարազատներին ու օգնություն հասցնեին»,- գրել է Զապորոժիեի ղեկավար Ալեքսանդր Ստարուխը։
Վաղը Զապորոժիեի մարզում զոհվածների հիշատակին սգո օր կլինի։
Ուկրաինական կողմի նախնական տվյալներով՝ Զապորոժիեի ուղղությամբ 16 հրթիռ է արձակվել «С-300» զենիթահրթիռային համակարգերից։
Ռուսաստանը գնդակոծության մեջ մեղադրել է Ուկրաինային։ Մեկ ժամ անց Զապորոժիեի շրջանի օկուպացիոն վարչակազմի ներկայացուցիչ Վլադիմիր Ռոգովը նույնպես հայտնել է, որ գնդակոծվել է խաղաղ բնակիչներով մեքենաների շարասյունը։ Նրա խոսքով՝ զոհվել է 23, վիրավորվել՝ 34 մարդ։
Զապորոժիեի շրջանի մայրաքաղաք Զապորոժիեն գտնվում է Ուկրաինայի վերահսկողության տակ։ Տարածաշրջանի մի մասը, սակայն, օկուպացված է ռուսական զորքերի կողմից։ Այսօր ՌԴ նախագահ Վլադիմիր Պուտինը հրամանագրեր է ստորագրելու Զապորոժիեի և Խերսոնի շրջանների անկախությունը ճանաչելու մասին։ Սպասվում է, որ մի քանի ժամից նա փաստաթղթեր կստորագրի դրանց անեքսիայի՝ Ռուսաստանի կազմի մեջ մտնելու վերաբերյալ։
Տաթև Ֆռանգյան
