23.03.2026 | 23:28
«Դեմոկրատները սա պատերազմ են անվանում, մենք դա կոչում ենք ռազմական գործողություն»․ Թրամփը՝ Իրանի հետ հակամարտության մասին
Ադրբեջանցի պաշտոնյաների նկատմամբ պատժամիջոցների մասին բանաձև է ներկայացվել ԱՄՆ Սենատ
Քաղաքականություն
28.09.2022 | 13:47
ԱՄՆ Սենատի միջազգային հարաբերությունների հանձնաժողովի նախագահ Բոբ Մենենդեսը ներկայացրել է բանաձև, որը դատապարտում է Հայաստանի դեմ Ադրբեջանի անօրինական հարձակումները և կոչ է անում Միացյալ Նահանգներին՝ անհապաղ դադարեցնել անվտանգության ոլորտում Ադրբեջանին ցուցաբերվող ամբողջ օգնությունն ու պատժամիջոցներ կիրառել:
Երկկուսակցական բանաձևը, որը ներկայացվել է ադրբեջանական զինուժի կողմից Հայաստանի դեմ ռազմական գործողությունների սանձազերծումից հետո, Բայդենին կոչ է անում որոշում կայացնել՝ արդյո՞ք Ադրբեջանի պաշտոնյաները պետք է ենթարկվեն պատժամիջոցների՝ «Մագնիտսկու մարդու իրավունքների» ակտի համաձայն:
Նաև կոչ է արվում Պետքարտուղարությանը բավարարել հաշվետվությունների բոլոր պահանջները՝ անհապաղ դադարեցնել անվտանգության ոլորտում Ադրբեջանին ցուցաբերվող ամբողջ օգնությունը, քանի որ դրանք տրամադրելով՝ կառավարությունը շարունակում է բացառություններ անել՝ շրջանցելով 1992 թվականի օրենքը, որն արգելում է ԱՄՆ զինված ուժերին օգնություն տրամադրել Ադրբեջանին՝ առանց հաշվետվությունների և հիմնավորման պարտադիր պահանջների։
«Ադրբեջանի վերսկսած հարձակումը հայկական տարածքի վրա և քաղաքացիական ենթակառուցվածքների կոպիտ թիրախավորումը մարդկային կյանքի հանդեպ արհամարհանքի սարսափելի ցուցադրություն է։ Քանի որ տարածաշրջանի համայնքները, ներառյալ՝ Կապանը, Գորիսը, Ջերմուկը, Վարդենիսը և Ճակատենը տառապում են Ալիևի վարչակարգից, Միացյալ Նահանգները պետք է աջակցության խոսքերն ամրապնդի վճռական գործողություններով՝ ի շահ Հայաստանի ժողովրդի։ Կառավարությունը պետք է ճիշտ վարվի և մեկընդմիշտ դադարեցնի Ադրբեջանին անվտանգության ոլորտում օգնություն ցուցաբերելը»,- ասել է բանաձևի հեղինակ Բոբ Մենենդեսը։
Բանաձևը ներկայացնելիս Մենենդեսին է միացել նաև սենատոր Մարկո Ռուբիոն։
Տաթև Ֆռանգյան
