09.10.2026 | 13:43
Մեսիի հրաժեշտի հանդիպումը դիտել է 3,5 միլիարդ մարդ
Աթենքում խորապես սխալվում են՝ ենթադրելով, թե նրանց կփրկի ԱՄՆ-ի և Եվրոպայի աջակցությունը․ Էրդողանը կրկին սպառնացել է Հունաստանին
Քաղաքականություն
27.09.2022 | 23:25
Թուրքիայի նախագահ Ռեջեփ Թայիփ Էրդողանը կրկին սպառնացել է Հունաստանին։ Անադոլու գործակալության փոխանցմամբ՝ նա Աթենքին մեղադրել է սադրանքների մեջ։
«Մենք քաջատեղյակ ենք այն շրջանակների իրական նպատակներին, որոնք Հունաստանին հրահրում են Թուրքիայի հետ առճակատման։ Թուրքիան դատապարտում է Էգեյան և Միջերկրական ծովերն առճակատման ու արյունահեղության գոտիների վերածելու ցանկացած փորձ։ Մենք հանդես ենք գալիս խաղաղության և կայունության օգտին»,- ասել է Էրդողանը։
Նա նշել է, թե Հունաստանի կողմից կղզիներում, ինչպես նաև Թուրքիայի հետ ցամաքային սահմանին մոտ՝ Արևմտյան Թրակիայում զենքի տեղակայումն Անկարային չի վախեցնում, քանի որ «Թուրքիայի հզորությունը շատ ավելի մեծ է»։
«Միևնույն ժամանակ, ես ուզում եմ զգուշացնել հույն ժողովրդին երկրի քողարկված օկուպացիայի սպառնալիքի մասին։ Աթենքում խորապես սխալվում են՝ ենթադրելով, թե նրանց կփրկի ԱՄՆ-ից ու Եվրոպայի երկրներից աջակցությունը։ Չի՛ օգնի»,- ասել է Թուրքիայի նախագահը։
Հիշեցնենք, որ ավելի վաղ էլ Էրդողանը հայտարարել էր, թե Աթենքին Թուրքիայի պատասխանը կարող է տրվել «ցանկացած գիշեր»։ Նա նաև Աթենքին կոչ էր արել հիշել պատմությունն ու դասեր քաղել Զմյուռնիայում ժամանակին տեղի ունեցածից։
«Մենք միայն մի բառ ունենք ասելու Հունաստանին՝ մի՛ մոռացեք Իզմիրը (Զմյուռնիա)»,- ասել էր Էրդողանը՝ հիշեցնելով 1922-ին տեղի ունեցած Զմյուռնիայի աղետը՝ տեղի հույն և հայ բնակչության կոտորածը թուրքական զորքերի կողմից։
Էմմա Չոբանյան
