18.05.2026 | 14:03
Մայիսի 15-18-ը բացահայտվել է 305 հանցագործություն․ ՆԳՆ ոստիկանություն
ՌԴ-ի համար հատուկ տրիբունալ ստեղծել․ Զելենսկին ՄԱԿ-ի Գլխավոր ասամբլեայում առաջարկ է ներկայացրել
Քաղաքականություն
22.09.2022 | 12:16
Ուկրաինայի նախագահ Վլադիմիր Զելենսկին առաջարկել է «խաղաղության բանաձև», որի կետերից մեկը վերաբերում է Ուկրաինա ներխուժելու համար Ռուսաստանի պատասխանատվության հարցին։ Այս մասին Զելենսկին խոսել է ՄԱԿ-ի Գլխավոր ասամբլեայի 77-րդ նստաշրջանի պատվիրակներին ուղղված տեսաուղերձում։
«Ուկրաինայի դեմ հանցագործություն է կատարվել, և մենք պահանջում ենք արդար պատիժ… Ուկրաինան պատիժ է պահանջում մեր տարածքը գողանալու փորձի համար, պատիժ՝ հազարավոր մարդկանց սպանության համար, պատիժ՝ կանանց և տղամարդկանց խոշտանգումների և նվաստացման համար, պատիժ՝ այն աղետալի տուրբուլենտության համար, որը Ռուսաստանը հրահրեց իր անօրինական պատերազմով, ոչ միայն մեզ՝ ուկրաինացիներիս, այլև ամբողջ աշխարհի համար»,- հայտարարել է Ուկրաինայի նախագահը։
Զելենսկին կոչ է արել շարունակել Ռուսաստանի Դաշնության դեմ պատժամիջոցների կիրառումը, մեկուսացնել երկիրը միջազգային կազմակերպություններից մինչև պատերազմի ավարտը և զրկել ձայնի իրավունքից, ներառյալ՝ ՄԱԿ-ի Անվտանգության խորհրդում վետոյի իրավունքից, ռուսաստանի քաղաքացիների նկատմամբ վիզային սահմանափակումներ կիրառել, Ռուսաստանի հանցագործությունների հարցով հատուկ տրիբունալ ստեղծել և վնասի փոխհատուցման մեխանիզմ մշակել։
«Ռուսաստանը պարտավոր է այս պատերազմի համար վճարել իր ակտիվներով։ Սա նույնպես պատիժ է։ Սա ամենավատ պատիժներից մեկն է ռուս պաշտոնյաների համար, ովքեր ամեն ինչից բարձր են գնահատում փողը»,- ասել է Ուկրաինայի ղեկավարը։
Զելենսկու առաջարկած «խաղաղության բանաձևը» ենթադրում է ևս չորս կետ՝ կյանքի պաշտպանություն, անվտանգության և տարածքային ամբողջականության վերականգնում, անվտանգության երաշխիքներ և պաշտպանվելու վճռականություն։
Նրա խոսքով՝ այս բանաձեւը կարող է գործել ոչ միայն Ուկրաինայի, այլև այլ երկրների համար, որոնք կարող են հայտնվել նմանատիպ իրավիճակում։
Զելենսկին ընդգծել է, որ ռազմական հակամարտության կարգավորումը կարող է տեղի ունենալ միայն ուկրաինական «խաղաղության բանաձևի» հիման վրա։
Տաթև Ֆռանգյան
