09.10.2026 | 13:43
Մեսիի հրաժեշտի հանդիպումը դիտել է 3,5 միլիարդ մարդ
Բորելը նամակ է հղել Թուրքիային՝ զգուշացնելով Հունաստանի հետ լարվածությունը սրող քայլեր չձեռնարկել
Քաղաքականություն
21.09.2022 | 23:30
ԵՄ արտաքին քաղաքականության ղեկավար Ժոզեպ Բորելը նամակ է գրել Թուրքիայի ԱԳ նախարար Մևլութ Չավուշօղլուին՝ նշելով, որ «Թուրքիան հակառակ ուղղությամբ քայլեր է ձեռնարկում» Հունաստանի հետ ճգնաժամի ապաէսկալացման հարցում։ Այն մասին հունական Kathimerini-ին հայտնել են դիվանագիտական աղբյուրները։
Հաղորդվում է, որ Բորելը նամակում նշել է, որ «հունական տարածքի վրայով թռիչքները, հայտարարությունները, որոնք կասկածի տակ են դնում Էգեյան ծովի կղզիների նկատմամբ Հունաստանի անսակարկելի ինքնիշխանությունը, ինչպես նաև Հունաստանի և հույն ժողովրդի դեմ թշնամական հռետորաբանության սրումը, շարժվում են ապաէսկալացիային հակառակ ուղղությամբ»։
Բորելի նամակը ուղարկվել է Չավուշօղլուի այն մեկնաբանություններից հետո, թե «Հունաստանն է պատասխանատու ճգնաժամի համար»։
«Թուրքիայի տեսանելիությունն ու հաջողությունները միջազգային ասպարեզում խելագարության են հասցնում Հունաստանին: Այդ իսկ պատճառով Հունաստանը նույնպես ցանկանում է սադրել Թուրքիային»,- սեպտեմբերի 14-ին ասել էր Չավուշօղլուն։
Թուրքիայի նախագահ Ռեջեփ Թայիփ Էրդողանն Աթենքին մեղադրել էր Էգեյան ծովի կղզիներն «օկուպացնելու» մեջ՝ ասելով, որ Թուրքիան պատրաստ է «անելու այն, ինչ անհրաժեշտ է»։ Նա նաև սպառնացել էր Հունաստանին՝ նշելով, որ «ցանկացած գիշեր կարող են այցելել թուրքական զորքերը»։
Հունաստանի վարչապետ Կիրիակոս Միցոտակիսը Թուրքիայի նախագահի խոսքերը համարել էր «անընդունելի» և նշել, որ Էրդողանը գալիք ընտրություններից առաջ օգտագործում է «ազգայնականությունը» և «լարվածության աճը»։
Էմմա Չոբանյան
