Իրենք եկել են ոչ միայն հասցեներ հայտարարելով, այլև դագաղներով. Արմենուհի Կյուրեղյան․ ՏԵՍԱՆՅՈՒԹ

«Մտածում եմ, որ կառավարող կուսակցությունում կան մարդիկ, որոնց համար առաջին տեղում ոչ թե Փաշինյանի պաշտպանությունն է, այլ հայրենիքի պաշտպանությունը։ Այս մասին սեպտեմբերի 15-ին լրագրողների հետ զրույցում ասել է «Հայաստան» խմբակցության պատգամավոր Արմենուհի Կյուրեղյանը՝ հավելելով՝ պատկերացնո՞ւմ եք, թե ինչ դրության մեջ կհայտնվեն այդ պատգամավորները, եթե ես նրանց անունները տամ։

Անդրադառնալով հարցին, թե արդյոք բանակցություններ վարվում են կառավարող կուսակցության ներկայացուցիչների հետ, Կյուրեղյանն ընդգծեց, որ գործընթացը գնում է իր ընթացքով։ «Մենք գնում ենք դեպի արդյունք։ Մեր խնդիրը վարչապետի հրաժարականն է, եւ մենք կլուծենք այդ խնդիրը, անգամ եթե ինչ-որ մեկի համար անցանկալի է։ Մենք ունենք 35 մանդատ, և անհրաժեշտ է նաև 36-րդը, որպեսզի կարողանանք այդ գործընթացն սկսել։ Եվ 72 ժամանոց ռեժիմում նաև պետք է ապահովել 18 ձայն, որը քվերակության ժամանակ պետք է»։

Կյուրեղյանը, անդրադառնալով ԱԺ նիստերի դահլիճում «Հայաստան» խմբակցության պատգամավոր Գեղամ Մանուկյանի ելույթից հետո ԱԺ-ում ստեղծված լարված իրավիճակին, հայտնեց, որ ՔՊ-ականները վեճը փորձել են շարունակել դահլիճից դուրս, եւ իրենց պատգամավորներ Բաբկեն Թունյանի ու Նարեկ Բաբայանի հետ եկել է մի կասկածելի անձ, որը բղավել է՝ «ինչո՞ւ եք հայհոյում»։ Մինչդեռ, Արմենուհի Կյուրեղյանի պնդմամբ, ընդդիմադիրներից որեւէ մեկը չի հայհոյել, այդ անձն այդպես է բղավել՝ իր սադրանքն արդարացնելու համար։ «Այն, որ սադրիչներ կարող էին լինել, մի կասկածեք, ամեն դեպքում սաստողներ էլ կային»,- ասաց ընդդիմադիր պատգամավորը։

Անդրադառնալով բողոքի ակցիայի ժամանակա հարթակից պատգամավորների հասցեների հրապարակման փաստի վերաբերյալ քննադատությանը, Կյուրեղյանն ընդգծեց․ «2018 թվականին այդ նույն մարդիկ, որ այստեղ խոսում են իրենց հասցեների պաշտպանության մասին, եկել էին ոչ միայն հասցեներ հայտարարելու ճանապարհով, այլ նաև գագաղներ շարելու ճանապարհով»։

Մանրամասները՝ տեսանյութում։