07.10.2026 | 23:48
Արթուր Դանիելյանը կալանավորվեց
Ադրբեջանը հայտարարել է, թե պատրաստ է ՀՀ-ին հանձնել 100 հայ զինծառայողի մարմին. Կարմիր Խաչի հայաստանյան գրասենյակը հաստատում է
Հասարակություն
14.09.2022 | 19:22
Այսօր Ադրբեջանի ռազմագերիների, անհետ կորածների և պատանդների հարցերով պետական հանձնաժողովը հայտարարություն էր տարածել այն մասին, որ պատրաստ է միակողմանիորեն հանձնել հայ շուրջ 100 զինծառայողների մարմինները և այդ մասին տեղեկացվել է Կարմիր խաչի միջազգային գրասենյակին։ Ըստ հանձնաժողովի՝ զոհերը գրանցվել են սեպտեմբերի 12-ի և 13-ի ռազմական գործողությունների ընթացքում։
Հայաստանում Կարմիր խաչի հաղորդակցման ծրագրերի ղեկավար Զառա Ամատունին Factor.am-ին հայտնեց, որ իրենք ևս տեղեկացված են տարածված հայտարարության մասին. «Կարմիր խաչը պատրաստ է որպես միջնորդ մասնակցել մարդասիրական այդ առաքելությանը»,- նշեց Ամատունին։
Հիշեցնենք՝ սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է հրետանային միջոցներ, ականանետներ, ԱԹՍ-ներ և խոշոր տրամաչափի հրաձգային զինատեսակներ։ Ադրբեջանական ագրեսիայի հետևանքով հայկական կողմն ունի առնվազն 105 զոհ, այդ թվում՝ խաղաղ բնակիչներ։ Բնակավայրերի հրետակոծության հետևանքով վիրավորում են ստացել նաև քաղաքացիական անձինք: Ժամը 18:00-ի դրությամբ՝ Սոթքից մինչև Գորիս հրթիռակոծությունը շարունակվում է․ կիրառվում են ԱԹՍ-ներ։
Ռոզա Վարդանյան
