Մարտեր են ընթանում Սոթքից Գորիս ողջ սահմանին․ ՄԻՊ-ը տեղահանվածների թիվ է հայտնել․ Լուրեր

• Այսօր ժամը 15-ի դրությամբ իրադրությունը հայ-ադրբեջանական սահմանագծին կրկին ծայրահեղ լարվել է։ Այս մասին հայտնել է ՀՀ ՊՆ մամուլի խոսնակ Արամ Թորոսյանը։ Նա նշել է, որ 13:00-ից սկսած թշնամին վերսկսել է ինտենսիվ հրետանային և հրթիռային հարվածները Սոթքից մինչև Գորիս ընկած ողջ սահմանին՝ թիրախավորելով նաև խաղաղ բնակավայրերը։ Ադրբեջանի զինուժը լայնորեն կիրառել է նաև ԱԹՍ-ներ։ Թորոսյանը հայտնել է, որ ադրբեջանակն զինուժը վերսկսել է նաև դիրքային առաջխաղացման փորձերը։
  Ադրբեջանական հարձակումից հետո առնվազն 2570 անձ տեղահանվել են իրենց տներից․ Գեղարքունիքի մարզի Սոթք, Նորաբակ, Կութ, Ազատ, Այրք, Տրետուք, Կուտակավան, Սյունիքի մարզի Ճակատեն, Շիկահող, Սրաշեն, Ներքին Հանդ, Աղիտու, Ակներ, Վերին Շեն համայնքներից։ Այս մասին հայտնել է ՄԻՊ Քրիստինե Գրիգորյանը։ Տեղահանվածների գերակշիռ մեծամասնությունը կանայք են, երեխաներ, տարեցներ։ Պաշտպանը նաև հայտնել է, որ ադրբեջանցիների հարձակումների հետևանքով չորս քաղաքացիական անձ վիրավորում է ստացել։
• Ջերմուկ համայնքի ղեկավար Վահագն Արսենյանը Ֆակտորին հայտնել է, որ Ջերմուկում գիշերվանից մինչև առավոտյան 10-ը կրակոցները չեն դադարել: Առավել ծանր վիճակ լուսադեմին է եղել, թշնամին հրետակոծություն է սկսել: Կեսօրից հետո ինտենսիվությունը մի փոքր թուլացել է։ Արսենյանը հայտնել է, որ կանանց և երեխաներին տարհանել են, իսկ քաղաքում մնացածները ինքնապաշտպանական ջոկատ են կազմել։ Քաղաքում գազամատակարարումն անջատել են անվտանգության նկատառումներով։

Այս ժամի լուրերը՝ տեսանյութում։