05.11.2024 | 20:40
Վալենսիան 31,4 միլիարդ եվրո է պահանջում կենտրոնական իշխանություններից ջրհեղեղից տուժածների համար
Ինձ համար անակնկալ էր, որ ես տեղյակ չեմ այս նամակների մասին, ո՞ւմ եք զեկուցել. վարչապետը ՍԱՊԾ պետից պարզաբանում պահանջեց
Տնտեսություն
24.05.2018 | 11:46
ՀՀ կառավարության այսօրվա նիստում վարչապետ Նիկոլ Փաշինյանը մինչ օրակարգի հարցերին անցնելը նշեց՝ տեղեկություն ունի, որ Սննդի անվտանգության ծառայության պետ Իշխան Կարապետյանը մայիսի 10-ին և մայիսի 16-ին նամակներ է ստացել Ռուսաստանի Դաշնության «Ռոսսելխոզնադզոր» կազմակերպությունից: «Ինձ համար անակնկալ էր, որ ես տեղյակ չեմ այս նամակների մասին, պարոն Կարապետյան ես ուզում եմ իմանալ Ձեր գործողությունները այս նամակները ստանալուց հետո»,- դիմելով ՍԱՊԾ պետին՝ հարցրեց վարչապետը:
Ի պատասխան Իշխան Կարապետյանն ասաց, որ այդ նամակները պարբերական բնույթ են կրում. «Տարվա ընթացքում մենք ստանում ենք բազմաթիվ նամակներ, և մենք նույնպես ուղարկում ենք նամակներ Ռուսաստանի մեր գործընկերներին»:
Կառավարության ղեկավարը շարունակեց պնդել՝ Իշխան Կարապետյանն ում է զեկուցել այդ մասին: «Ո՞ր իրավիճակի մասին, պարոն վարչապետ»,- փորձեց հասկանալ Իշխան Կարապետյանը: «Էն, որ մեր ռուս գործընկերներից նամակներ ենք ստանում, կոնկրետ իրավիճակներ են ներկայացնում: Ես ուզում եմ իմանալ ո՞ւմ եք այս մասին զեկուցել: Ես վարչապետի պաշտոնը ստանձնելուց հետո զանգել եմ Ձեզ հարցրել, խնդիրներ ունե՞նք գյուղմթերքի արտահանման վերաբերյալ, Դուք ասել եք, որ ոչ: Դրանից հետո նամակներ եք ստացել և իմանալով, որ ինձ դա հետաքրքրում է, ուզում եմ իմանալ՝ ո՞ւմ եք զեկուցել և ի՞նչ խնդիրներ եք ձեռնարկել այդ խնդիրները վերացնելու ուղղությամբ »,- պարզաբանեց վարչապետը:
Իշխան Կարապետյանը, սակայն, հարցը կրկին փորձեց շրջանցել Փաշինյանի հերթական հորդորից հետո, ՍԱՊԾ պետն ասաց՝ փորձել է կապվել փոխվարչապետ Արարատ Միրզոյանի հետ, բայց չի ստացվել: Կարապետյանն, այդուհանդերձ, վստահեցրեց, որ խնդրի առնչությամբ քայլեր ձեռնարկել են: Վարչապետն էլ պահանջեց, որ գյուղմթերքների արտահանման գործընթացը տեղի ունենա անհրաժեշտ պայմանների խստիվ պահպանմամբ:
