Վիճակը ծայրահեղ օրհասական է. Իշխան Սաղաթելյանը նախկին նախագահներին և բարձրաստիճան պաշտոնյաներին առաջարկում է նստել սեղանի շուրջ․ ՏԵՍԱՆՅՈՒԹ

«Մենք ծանոթանալով ԱԺ հայտարարության նախագծի տեքստին, գտանք, որ այն չի արտացոլում ամբողջական իրավիճակը, մենք այդ տեքստի հետ կապված ունեինք մեր դիտարկումներն ու գնահատականը, որը պետք է ներառվեր ԱԺ հայտարարության տեքստի մեջ»,- այս մասին, այսօր՝ սեպտեմբերի 13-ին, ԱԺ-ում լրագրողների հետ զրույցում նշեց ԱԺ «Հայաստան» խմբակցության պատգամավոր Իշխան Սաղաթելյանը:

Նրա դիտարկմամբ՝ երբ խորհրդարանական երկրում Աժ-ն հայտարարություն է անում, դա պետք է համարժեք լինի ստեղծված իրավիճակին։

«Մենք ներկայացրել ենք հայտարարության 4 կետեր: Իշխող մեծամասնության կողմից մեր ներկայացրած առաջարկները, պահանջները մերժվեցին: Իրենք որևէ կետի հետ կապված չեն կարող որևէ հիմնավոր պատճառաբանություն տալ, որովհետև դրա հիմքերը չկան: Մերժեցին այն պատճառաբանությամբ, ինչպես նախկինում մերժել են մեր բոլոր առաջարկությունները՝ երկրի անվտանգությանն ու պետականությանը առնչվող, այն տրամաբանությամբ, ինչպես մերժեցին Շուշիում կնքված հայտարարության վերաբերյալ մեր հայտարարությունը, ինչպես տապալեցին ու բոյկոտեցին մեր մնացած նախաձեռնությունները»,- նշեց ընդդիմադիր պատգամամավորը՝ կարծիք հայտնելով, որ գործող իշխանությունը ՀՀ պետական շահի հետ կապ չունի:

Սաղաթելյանի խոսքով, երեսպաշտություն է, երբ իշխող թիմը խոսում է միասնականությունից ու պետականությունից. «Եթե իրենք պատրաստ չեն պաշտպանելու մեր պետությունը, մենք ինչի՞ շուրջ միասնական լինենք՝ պետությունը հանձնելո՞ւ»:

Հարցին, թե որոնք են լինելու «Հայաստան» դաշինքի հետագա քայլերը, պատգամավորը պատասխանեց. «Վիճակն օրհասական է, անհրաժեշտ է, որ երկրի բոլոր ազդեցիկ դեմքերը առաջիկայում հավաքվեն մեկ սեղանի շուրջ՝ սկսած Հայոց Վեհափառից, նախկին նախագահներից, ԱԳ բոլոր նախկին նախարարներից, ԳՇ նախկին պետերից, պաշտպանության նախկին նախարարներից: Պետք է հավաքվենք մի սեղանի շուրջ, ընդունեն որոշումներ, հանդես գան հայտարարության տեքստով՝ երկիրն այս վիճակից դուրս բերելու համար:

Էս մարդիկ ի վիճակի չեն և ադեկվատ չեն ղեկավարելու մեր երկիրը․․․ Այս իշխանությունը ո՛չ պատերազմ վարել գիտի, ո՛չ բանակցություն վարել գիտի, հետևողականորեն երկիրը տանում է դեպի անդունդը: Մենք մեր հասանելիքն արել ենք, բայց սրանցով հնարավոր չէ, պետք է գնան»:

Մանրամասները՝ տեսանյութում։