16.09.2026 | 13:39
Հայկական ֆուտբոլում տրանսֆերային ռեկորդ է գրանցվել
ՌԴ ԱԳՆ-ն հայտարարություն է տարածել Մոսկվայի ժամանակով 09։00-ից հրադադարի մասին պայմանավորվածության վերաբերյալ
Քաղաքականություն
13.09.2022 | 12:40
ՌԴ ԱԳՆ-ն արձագանքել է նախօրեից ՀՀ-ի վրա Ադրբեջանի հարձակմանը, սակայն առանց հասցեական դատապարտումների։
Մասնավորապես, ՌԴ ԱԳ հայտարարության մեջ ասվում է, որ Մոսկվան ծայրահեղ մտահոգությունն է հայտնում «սեպտեմբերի 13-ի գիշերը հայ-ադրբեջանական սահմանի առանձին հատվածներում իրավիճակի կտրուկ սրման կապակցությամբ»։
«Կոչ ենք անում կողմերին զերծ մնալ իրավիճակի հետագա սրումից, զսպվածություն ցուցաբերել և խստորեն պահպանել հրադադարը՝ համաձայն Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի, հունվարի 11-ի և 2021 թվականի նոյեմբերի 26-ի եռակողմ հայտարարությունների։ Բաքվի ու Երևանի հետ գտնվում ենք սերտ շփման մեջ։ Հայաստանի ղեկավարությունից ստացվել է դիմում՝ առկա երկկողմ պայմանագրերին համապատասխան և ՀԱՊԿ-ի միջոցով իրավիճակի կարգավորմանն աջակցելու խնդրանքով։ Մենք ակնկալում ենք, որ Ռուսաստանի միջնորդության արդյունքում ձեռք բերված պայմանավորվածությունը սեպտեմբերի 13-ին Մոսկվայի ժամանակով 9.00-ից կիրականացվի ամբողջությամբ»,-ասվում է հայտարարության մեջ։
Նշվում է նաև, որ Հայաստանի ու Ադրբեջանի միջև բոլոր հարցերը պետք է լուծվեն բացառապես քաղաքական, դիվանագիտական ճանապարհով, իսկ սահմանային հարցերը՝ Ռուսաստանի խորհրդատվական աջակցությամբ հայ-ադրբեջանական սահմանի դելիմիտացիայի երկկողմ հանձնաժողովի աշխատանքի շրջանակներում։
Հայկական կողմից առայժմ պաշտոնապես չի հաստատվել հրադադարի վերաբերյալ պայմանավորվածությունը կամ հրադադարի փաստը։
Էմմա Չոբանյան
