Քաղաքականություն
12.09.2022 | 17:46
Շվեդիայի վարչապետ Մագդալենա Անդերսոնը հայտարարել է, որ շարունակելու են պաշտպանել քրդերի իրավունքները, գրում են թուրքական լրատվամիջոցները։
«Մենք կշարունակենք պաշտպանել քրդերի իրավունքները։ Շվեդիայի քաղաքացիություն ունեցող ոչ մի քուրդ Թուրքիային չի արտահանձնվի։ Քանի դեռ ես Շվեդիայի վարչապետն եմ, մենք միշտ պաշտպանելու ենք քրդերի իրավունքները։ Կարծում եմ՝ այստեղ շատ կարևոր է հստակ հայտարարել, որ չնայած Թուրքիայի հետ ձեռք բերված պայմանավորվածությանը՝ շվեդական քաղաքացիություն ունեցող ոչ մի քուրդ չի արտահանձնվի Թուրքիային»,- ասել է Անդերսոնը՝ պատասխանելով քրդական Rudaw լրատվականի հարցերին։
«Շվեդիայի օրենքներին համաձայն՝ ցանկացած անձ, որը չի կատարել ահաբեկչական գործողություն, չի կարող արտահանձնվել, ուստի յուրաքանչյուրի կյանքը, որը, Շվեդիայի օրենսդրության համաձայն, ահաբեկչություն չի կատարել, լիովին պաշտպանված է»,- հավելել է պաշտոնյան
Հիշեցնենք, որ ՆԱՏՕ-ին Շվեդիայի և Ֆինլանդիայի անդամակցության վետոն Թուրքիայի կողմից հանվել էր և երեք երկրները հուշագիր էին ստորագրել, որի համաձայն, մասնավորապես, Սկանդինավյան երկրներն Անկարային են արտահանձնելու «ահաբեկիչներին»։ Թուրքիան էլ գրավոր հարցում է ուղարկել Շվեդիային և Ֆինլանդիային՝ պահանջելով արտահանձնել «Քուրդիստանի աշխատավորական կուսակցության» և Գյուլենական շարժման՝ FETO-ի ներկայացուցիչներին։
Ավելի վաղ Շվեդիայի և Ֆինլանդիայի իշխանությունները վստահեցրել էին, որ կկատարեն ահաբեկչության դեմ պայքարի վերաբերյալ Թուրքիայի հետ ձեռք բերված պայմանավորվածությունները, սակայն, դրա հետ մեկտեղ, չէին երաշխավորել քրդերի արտահանձնումը թուրքական դիմումների համաձայն։ Նրանք նշել էին, որ արտահանձնման որոշումը կայացնելու է դատարանը և գործընթացներն ընթանալու են երկրների օրենսդրությանը համապատասխան։
Էմմա Չոբանյան
