01.07.2026 | 22:57
ԱԺ պատգամավորի երդման տեքստը կփոփոխվի․ օրենքի նախագիծը դրական եզրակացություն է ստացել
Պետերբուրգի՝ Պուտինի պաշտոնանկությունը պահանջող շրջանային պատգամավորները ոստիկանություն են կանչվել
Քաղաքականություն
09.09.2022 | 16:19
Սանկտ Պետերբուրգում «Սմոլնինսկոյե» մունիցիպալ կազմավորման խորհրդի յոթ պատգամավորներ կանչվել են ոստիկանություն՝ ռուսական բանակի «վարկաբեկման» վերաբերյալ արձանագրություններ կազմելու համար։ Այս մասին Mediazone-ին ասել է պատգամավոր Դմիտրի Պալյուգան։
Ըստ Սանկտ Պետերբուրգի Կենտրոնական շրջանի ՆԳՆ հաղորդագրության, որը ստացել է պատգամավորներից Նիկիտա Յուֆերևը, նրանք պատրաստվում են արձանագրություն կազմել՝ համաձայն ՌԴ Վարչական իրավախախտումների մասին օրենսգրքի 20.3.3-րդ հոդվածի 1-ին մասի՝ «գործող իշխանության վարկաբեկմանն ուղղված գործողությունների պատճառով»։
Ոստիկանության տվյալներով՝ պատգամավորներն այս գործողությունները կատարել են սեպտեմբերի 7-ին ժամը 19:00-ի սահմաններում՝ Օդեսսկայա փողոցի 1-ին տան հասցեում։ Այնտեղ է գտնվում Սմոլնինսկոյեի քաղաքապետարանի վարչակազմի շենքը։
Հայտնի է, որ Յուֆերևից բացի՝ ոստիկանություն են հրավիրվել նաև Պալյուգան, Դմիտրի Բալտրուկովն ու Դիանա Սերայան։
Սեպտեմբերի 7-ի երեկոյան Սմոլնինսկոյեի մունիցիպալիտետի պատգամավորները որոշել են Պետդումային կոչ անել ՌԴ նախագահ Վլադիմիր Պուտինին դավաճանության մեղադրանք առաջադրել՝ ուկրաինական պատերազմի պատճառով պաշտոնանկ անելու համար։ Դիմումի տեքստում, մասնավորապես, ասվում է, որ Ռուսաստանի «երիտասարդ աշխատունակ» քաղաքացիները զոհվում են ռազմական գործողությունների ընթացքում, իսկ ռուսական տնտեսությունը տուժում է։
Տաթև Ֆռանգյան
