Ինչպես են կեղծվում ռուս-ուկրաինական պատերազմի փաստերը․ թիրախում ՀՀ-ի քաղաքացիներն են․ ՏԵՍԱՆՅՈՒԹ

Գրեթե 200 օր ամբողջ աշխարհը շունչը պահած հետևում է Ուկրաինայի դեմ ՌԴ-ի սանձազերծած պատերազմի ընթացքին։ Պետություններն այս պատերազմի արդյունքով են պայմանավորում նոր աշխարհակարգի ձևավորումը։ Այս պատերազմի ընթացքում փորձության է ենթարկվում միջազգային իրավունքը՝ որպես պետությունների միջև կոնֆլիկտները լուծելու հիմնական և ընդունելի գործիք։ Արդյո՞ք այն դեռ ողջ է։ Թերևս, այս բարձր գինն է պատճառը, որ պատերազմի կողմերը չափազանց մեծ տեղ են տալիս քարոզչությանը, տեղեկատվական դաշտում պայքարին։

Պատերազմական քարոզչությունն ու կեղծիքը նոր երևույթ չեն․ ֆաշիստական Գերմանիայում կար պատերազմական պրոպագանդայի հատուկ ինստիտուտ, որը ղեկավարում էր Լուսավորության և քարոզչության նախարար Յոզեֆ Գեբելսը։ Նա ստի միջոցով փորձում էր բարձր պահել ռազմաճակատում անհաջողություններ կրող գերմանացիների ոգին՝ Հիտլերին ներկայացնելով ազգի հայր։ Եվ միայն 21-ամյա մի աղջնակ՝ Սոֆի Շոլը ուսանող ընկերների հետ թռուցիկներ բաժանելով՝ կարողանացավ գերմանացիներին հասցնել ողջ ճշմարտությունը պատերազմի մասին՝ ճեղքելով գեբելսյան պրոպագանդայի պատը։

Պատերազմական քարոզչության հոսքերն ակտիվորեն շրջանառվում են նաև Հայաստանում։ Ինչպե՞ս է փորձ արվում կեղծել պատերազմը տեղեկատվական դաշտում։

Factor TV-ի տաղավարում այս թեմայով քննարկմանը մասնակցում են Տեղեկատվական տեխնոլոգիաների և մեդիա ոլորտի խորհրդատու Արթուր Պապյանը, Իրազեկ քաղաքացիների միավորում ՀԿ ծրագրերի համակարգող Դանիել Իոաննիսյանը,  «Ռեգիոն» հետազոտական կենտրոնի տնօրեն Լաուրա Բաղդասարյանը, Խոսքի ազատության պաշտպանության կոմիտեի ղեկավար Աշոտ Մելիքյանը, լրագրող և Media.am կայքի խմբագիր Գեղամ Վարդանյանը։