«Նահանջի հրաման ա եղել, մեզ տարան Հադրութի զորամաս», «Սո՛ւտ ա ասում». դատարանում իրավիճակը լարվեց․ ՏԵՍԱՆՅՈՒԹ

Երևան քաղաքի ընդհանուր իրավասության դատարանում շարունակվում է պատերազմի ընթացքում մարտական դիրքն ինքնակամ լքելու մեջ մեղադրվող գումարտակի հրամանատար Իշխան Վահանյանի գործով դատական նիստը: Հարցաքննվում են վկաները:

Նրան մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։

«Հակառակորդի հարձակման ժամանակ եղել ենք Խուռհատ սարի վրա (Հադրութ քաղաքի մոտակայքում): Ես մի օր հետո եմ իմ վաշտի հետ բարձրացել սարը: Խուռհատ սարի հարձակման ժամանակ բազմաթիվ վիրավորներ են եղել, նրանց օգնություն էինք ցույց տալիս, այնտեղ ենք եղել 2 վաշտի հրամանատար, դասակի հրամանատար, վաշտի ավագը և գումարտակի հրամանատարը: Այդ ժամանակ գումարտակի հրամանատար Իշխան Վահանյանը ասել է՝ վիրավոր եմ, նստել է մեքենան ու գնացել:

Դրանից հետո մենք ընկել ենք շրջափակման մեջ: Ռադիոկապ չենք ունեցել, վերադասի հետ կապ չենք ունեցել, բջջայինով զանգեր ենք կատարել: Այնտեղ եղել եմ ես և Վարդանյան Վազգենը՝ ականանետային դասակի հրամանատրը և վաշտի ավագը:  Հակառակորդը կրակում էր, չէր թողնում դուրս գանք: Հետո սարի դոշով մի կերպ շրջանցել ենք, կարողացել ենք դուրս գալ շրջափակումից՝ մոտ 60 զինծառայողների հետ»,- պատմեց վկաներից մեկը՝  Պաշտպանության բանակի համապատասխան զորամասի 5-րդ հրաձգային գումարտակի 12-րդ (ուսումնական) վաշտի հրամանատար Հայկազ Գրիգորյանը:

Նրա խոսքով՝ պատերազմի ժամանակ վաշտերը եղել են իրարից 500-600 մ, նույնիսկ 1 կմ հեռավորության վրա: ««Չռիկներ» կոչող հատվածի դիմացի վրա է եղել իմ վաշտը… Հակառակորդը արդեն շրջափակում էր, հրետանակոծում էին բլուրը, հետքաշման հրաման ենք ստացել, իրականացվել է նահանջ… Մեզ տարել են Հադրութի զորամաս: Իմ վաշտը իմ գլխավորությամբ եղել է Հադրութում»,- նշեց Գրիգորյանը:

«Սուտ ա ասում»,- տեղից արձագանքեց դատարանի դահլիճում ներկա գտնվող 44-օրյա պատերազմի զոհերի հարազատներից մեկը:

«Մարտական դիրքերում այդ ժամանակ իմ վաշտից եղել է մեկ զոհ և մեկ վիրավոր… Հակառակորդը սկսեց ռմբակոծել զորամասը, մեզ տեղափոխեցին Հադրութի դպրոց: Այդ ժամանակ նոր նշանակումներ են եղել…»,- հավելեց վկան:

Մանրամասները տեսանյութում: