Ուկրաինան ու ԵՄ-ն մի շարք համաձայնագրեր են ստորագրել

Ուկրաինան և Եվրամիությունը սեպտեմբերի 5-ին Ասոցացման խորհրդի ութերորդ հանդիպման ժամանակ մի շարք համաձայնագրեր են ստորագրել, գրում է korrespondent-ը։

Եվրահանձնաժողովի հետ համաձայնագիր է ստորագրվել «Ուկրաինայում տուժած բնակչությանը և գյուղատնտեսական արտադրության աջակցության միջոցով խոցելիության նվազեցմանը և պարենային անվտանգության բարձրացմանն» ուղղված միջոցառումների ֆինանսավորման վերաբերյալ։ Այս միջոցառման ընդհանուր գնահատված արժեքը 500 միլիոն եվրո է։

Կողմերը նաև լրացուցիչ համաձայնագիր են ստորագրել (նամակների փոխանակման ձևով) կառավարության և Եվրահանձնաժողովի միջև «Արտակարգ իրավիճակում Ուկրաինային աջակցելու ԵՄ ծրագրի» ֆինանսավորման մասին։
Առաջարկվող փոփոխությունները ներառում են ինդիկատիվ բյուջեի բաշխման փոփոխություններ, որոնք պետք է կատարվեն՝ հաշվի առնելով բնակչության կարիքների վերագնահատումը և դրանք իրականացնողների կարողությունը։ Այսպիսով, դրամաշնորհների բյուջեի բաղադրիչը կավելանա 122 մլն եվրոյով՝ կրճատելով անուղղակի կառավարման և գնումների բաղադրիչները:

Ուկրաինան նաև համաձայնագիր է ստորագրել թվային տեխնոլոգիաների ներդրման՝ Եվրամիության «Թվային Եվրոպա» ծրագրին մասնակցելու մասին, որն իր հերթին պետք է փոխադարձ օգուտներ տրամադրի կողմերին՝ տվյալների պաշտպանության բարձր մակարդակի, թվային իրավունքների, հիմնարար իրավունքների և էթիկական չափանիշների պահպանմամբ։

Բացի այդ, համաձայնագիր է ստորագրվել մաքսային ոլորտում ԵՄ-ի համագործակցության ծրագրին Ուկրաինայի մասնակցության մասին։

Ուկրաինայի վարչապետ Դենիս Շմիգալը Բրյուսել կատարած այցի ընթացքում նաև քննարկել է էներգետիկայի ոլորտում ԵՄ-ի հետ համագործակցությունը։

Տաթև Ֆռանգյան