10.10.2026 | 21:37
Կանանց Հայաստանի հավաքականը ոչ-ոքի խաղաց Ինդոնեզիայի հետ
Էդուարդ Շարմազանովը՝ ԱԺ նախագահ նշանակվելու մասին
Քաղաքականություն
27.04.2017 | 13:15
ԱԺ փոխնախագահ, ՀՀԿ խոսնակ Էդուարդ Շարմազանովը չի ուզում մեկնաբանել մամուլի այն տեղեկությունները, որ ինքն է լինելու յոթերորդ գումարման խորհրդարանի նախագահը։
«Նման բան չկա, դրանք ընդամենը մամուլի լուրերն են, նման հարց ՀՀԿ-ում չի քննարկվել»,- Factor.am-ի հետ զրույցում ասաց նա:
Մեր դիտարկմանը՝ այդ դեպքում որտեղի՞ց են նման տեղեկություններ տարածվում, եթե որևէ հիմք չկա, Շարմազանովը խորհուրդ տվեց այդ հարցով դիմել լրագրողներին․ «Ձեր կոլեգաներին հարցրեք, ես ի՞նչ իմանամ, օրը մի թեկնածուի անուն գրում են․ նման բան չկա, որևէ քննարկում մեր կուսակցությունում մինչ օրս չի եղել: ՀՀԿ-ն ԱԺ նախագահի, փոխնախագահի, հանձնաժողովների ղեկավարների հարց չի քննարկել»։
Ի դեպ, ԱԺ փոխխոսնակը հիշեցրեց, որ դեռևս չեն ավարտվել ԱԺ գործող նախագահ Գալուստ Սահակյանի՝ այդ պաշտոնում լիազորությունները․ «Այսօր ես կոռեկտ չեմ համարում նման հարցի շուրջ քննարկումներ ծավալել»։
Հետաքրքրվեցինք, եթե ԱԺ նախագահ նշանակվելու առաջարկ ստանա, կհամաձայնի. Շարմազանովն այդպես էլ չհստակեցրեց՝ կրկին հղում անելով կոռեկտությանը։
Հիշեցնենք, որ ավելի վաղ Գալուստ Սահակյանը Tert.am-ի հետ զրույցում անուղակիորեն ասել էր, որ չի լինի ԱԺ նախագահ, այլ կլինի իր ձևակերպմամբ՝ սովորական, բայց ոչ սովորական պատգամավոր։
Ի դեպ, նոր խորհրդարանում, ըստ նոր ԸՕ-ի, լինելու է նաև ԱԺ մեկ փոխնախագահ ընդդիմությունից։
Սեդա Ղուկասյան
